رووداو دیجیتاڵ

سەرۆکی پەرلەمانی تورکیا رایدەگەیێنێت، لەپێناو کۆتاییهێنان بە پرسی کورد لە تورکیا و جێبەجێکردنی راسپاردەکانی کۆمیسیۆنی پەرلەمان، "سیاسەت بەرپرسیارێتیی خۆی جێبەجێ دەکات"؛ هیواش دەخوازێت لە نزیکترین کاتدا تورکیا بەسەر گەورەترین کێشەی بەردەمیدا زاڵ بێت.

نوعمان کورتوڵموش، سەرۆکی پەرلەمانی تورکیا لە سەردانێکیدا بۆ هێلسنکیی پایتەختی فینلاند، ئێوارەی رۆژی دووشەممە 1ـی حوزەیرانی 2026، لەگەڵ نوێنەرانی کۆمەڵگەی تورک لەو وڵاتە کۆبووەوە و رایگەیاند، ئەوان بە پەرۆشەوە کار بۆ سەرخستنی پرۆسەی "تورکیایەکی بێ تیرۆر" دەکەن.

کورتوڵموش ئاماژەی بەوە کرد، ئامانجیان لەم پرۆسەیە زیادکردنی یەکڕیزی، دابینکردنی ئاشتی و برایەتی و نەهێشتنی هەموو جۆرە جوداخوازی و هەڵاواردنێکی نەتەوەییە. گوتیشی: "پێکەوە تورکیایەک بنیات دەنێین کە هیچ مرۆڤێک بەهۆی تیرۆرەوە لەدەست نەدرێت و هیچ کەسێک هەست نەکات هاووڵاتییەکی پلە دووە."

سەرۆکی پەرلەمانی تورکیا تیشکی خستەسەر زیانە قورسەکانی رابردوو و گوتی: "هیوادارم ئەم پرسە کە نیوەی یەکەمین سەدەی کۆمارەکەمان و گیانی دەیان هەزار مرۆڤی ئێمەی بەخت
کرد و بووە هۆی زیانی لانیکەم 2.5 تریلیۆن دۆلاری، لە پشت خۆمانەوە جێبهێڵین."

لەبارەی کارەکانی "کۆمیسیۆنی یەکڕیزیی نیشتمانی، برایەتی و دیموکراسی" لە پەرلەمان پێکهێنراوە، کورتوڵموش گوتی: "بۆ جێبەجێکردنی داواکارییەکانی کۆمیسیۆنەکە، سیاسەت ئەو بەرپرسیارێتییەی دەکەوێتە ئەستۆی، جێبەجێی دەکات."

پرۆسەی نوێی چارەسەری نزیکەی ساڵێک و نیوە دەستیپێکردووە، چەند وێستگەیەکی گرنگی بڕیوە:

- 1ـی تشرینی یەکەمی 2024؛ دەوڵەت باخچەلی، سەرۆکی مەهەپە داوای لە عەبدوڵڵا ئۆجەلان کرد پەکەکە چەک دابنێت و باسی لە "مافی هیوا" کرد.

- 27ـی شوباتی 2025؛ ئۆجەلان لە زیندانی ئیمرالییەوە بانگەوازی بۆ پەکەکە کرد بۆ هەڵوەشاندنەوەی رێکخستنەکە و دانانی چەک.

- ئایاری 2025؛ پەکەکە لە کۆنگرەی 12ی خۆیدا بڕیاری کۆتاییهێنان بە خەباتی  چەکداریی دا.

- تەممووز - تشرینی دووەمی 2025؛ یەکەم گرووپی گەریلاکان چەکیان دانا و پەکەکە کشانەوەی هێزەکانی لە ناوخۆی تورکیا و ناوچەی "زاپ" لە هەرێمی کوردستان
    راگەیاند.

لە 5ـی ئابی 2025ـەوە، پەرلەمانی تورکیا کۆمیسیۆنێکی تایبەتی بۆ رێکخستنی چوارچێوە یاساییەکانی گەڕانەوەی چەکداران و تێکەڵکردنەوەیان بە کۆمەڵگە پێکهێناوە.

سەرەڕای ئەم هەنگاوانە، هێشتا لایەنەکان تێبینییان هەیە؛ دەم پارتی و پەکەکە داوای هەنگاوی خێراتر دەکەن، لە بەرامبەردا حکومەتی تورکیا جەخت دەکاتەوە کە دەبێت سەرجەم دامەزراوەکانی پەکەکە لە ئەورووپا و وڵاتانی دیکەش بە تەواوی هەڵبوەشێننەوە.