عێراقی ئێستا نە سەروەرییەکی بەهێزی هەیە، نە ئابووری بەهێز و ئاسایش و ئارامی، ئەمە سێ فاکتەری زۆر گرنگن بۆ شکستی دەوڵەت. ئەوەشی کە دەوڵەت رادەگرێت هەر بریتییە لە سێ فاکتەر و بنەمای سەرەکیی، سەروەریی و ژێرخانی ئابووری و ستراتیژی دوورمەودا، عێراق ئەوەشی نییە. ئەوەی هەیەتی ئابوورییەکی رەیعیی - مێگەل، دۆشین، بەرخۆری پارەی نەوت و موفتی ئامادە و پاڵاوگە نایاساییەکانە.
عێراق خەیاڵدانێکی نەگۆڕ و کۆنکرێتیی هەیە و هەرگیز بە پرۆسەکانی هەڵبژاردن ناگۆڕێت، بەکورتی عێراقی حاموڕابی و یاساکان و حەزارەتی رابردوو ئێستا ئیتر بۆ هەڵبژاردن ناشێت، چونکە هێز و میلیشیای چەکدار و ئەقتابگەلی گەورە هەن لە دەرەوەی یاساو دەسەڵاتیان لە یاساکان بەهێزترە. لە کۆنترۆڵکردنی ناوچەی سەوز و ماڵەکەی مستەفا کازمییدا دەرکەوت حەشدی شەعبی سوپای قوڵی دەوڵەتی مەزهەبییە و بەشێکە لە سیاسەتی مەرجەعیەتی قوم و نەجەف و خۆیان نەک بە ئەڵتەرناتیڤی دەوڵەت دەزانن بەڵکو دەوڵەتەکە خۆیانن.
بینیمان رۆژی 26-05-2021 بەغدا و کازمی شەو و رۆژێکی رەش و درێژ و پڕلە شەرمەزارییان بەڕێکرد و یاساو رێسایان بەتەواوی خستە خزمەتی چەکدارانی حەشدی شەعبی و فەرماندە شەعبییە پۆپۆلیستەکان. ئەوکاتەی دژە تیرۆری عێراق "قاسم موسڵح" فەرماندەی ئۆپەراسیۆنەکانی حەشدی شەعبیان بە ماددەی 4ی تیرۆر لە ناوچەی دۆرەی باشووری بەغدا دەستگیرکرد. حەشدی شەعبی ئیتر مانۆڕو یارییەکەی دەستپێکرد و نمایشە گەورەکەی کرد و کازمی ناچارکرد بچێتە ژێرەوەی یاساکانی ئەوان، لەکاتێکدا حەشدی شەعبی یاسای بۆ دەرکراوە لە 2016 و بودجەی خەیاڵی حکومەت و بیرە نەوتەکانیشیان لەژێر دەستیدایە ئیتر هەر کابینە و سەرۆکوەزیرێک بێت لە داهاتوو بەهەڵبژاردنیش یان خۆیانن یان تەسلیم و بێ کاریگەرە لەبەردەم بڕیار و هەژموونەکانی حەشدی شەعبی و کاراکتەرە سەربازییەکانی ( فەتح و گرووپەکانی نوجەبا و حیزبوڵڵاو رەبعەڵا و عەسائیبی ئەهلی حەق و فەرماندەکانی دەرەوەی حکومەت) دەرکەوت هەر ئەو هێزە راستەقینەی سێبەریش بوو نەیهێشت کازمی خۆی بەربژێر بکات.
لەدوای پرۆسەی ئازادیی هیچ جارێک لە عێراقدا هەڵبژاردن بە رێکاری یاسایی و لەکاتی خۆیدا نەکراوە، هیچ راپرسی و هەڵبژاردنێکیش بەبێ دەستێوەردان و ساختەکاریی رووینەداوە، لە مێژووی عێراقدا بە یەکەمین هەڵبژاردنی پەرلەمانی و یەکەمین راپرسی دەستوورییشەوە کە بۆ نووسینەوەی میساقی دەستووریی وڵات ئەنجامدرا لە ساڵی 2005.
ئەو هەڵبژاردنەی دادێ، 10ی ئۆکتۆبەری 2021، کاردانەوەیە و پرۆسەیەکی دیموکراسی ئاسایی نییە بۆ وڵاتێکی ئارام، لەژێر فشاری تووندی ئەمریکادایە بۆ دۆزینەوەی دەرچەیەکە تا شەرعییەت بدرێتە حوکمڕانییەکی یاسایی و دەستووریی لەبری ئەو دەسەڵاتە جەبریی و پاشاگەردانیی و زنجیرە کودەتایەی کە حەشدی شەعبیی دەمێکە دەستی داوەتێ و دەبێ کۆتایی بێت، بەڵام ئایا دەستەی حەشد ئەوەندە دەسەڵات و سێبەریی فراوان بێت هەڵبژاردن چۆن تەندروستانە دەکرێت بەبێ دەستوەردان؟
ئەوەی مەترسییە لە عێراق، لەسەر داهاتووی تاک و مەدەنییەت و دیموکراسی و فەزای ئازاد فاشیزمی خەوتووە. فۆڕمێک لە شێوەی سێبەری بەعسیزم کاری پێدەکرێت، بەڵام بە رەنگی مەزهەبگەراوە، ئهمریكا هەڵبژاردنی دەوێت بۆ مەبەستی خۆی، نیگەرانی هەڵبژاردن و ساختەکاریی و ئازادییش نییە، ئهمهریكا دەستی پۆڵاین و سێنتراڵیزمیی دەوێ، لەبری قاچی نەرمی دیموکراسیەت و مێشکی ئەکادیمیی و تەکنۆکرات لە کەوانەیەکدا ئەکادیمیستە زانکۆییەکان، وەک چۆن لە ئەفغانستان، میسر، تونس و سعودیە هەمان کاری کرد و تەنانەت لە تورکیاش سیکۆلاریزمی نەویست و بەکاریزماکردنی ئەردۆغان و کاڵکردنەوەی ئازادییەکان و دیموکراسی کردە مۆدێل.
ئەم عێراقه با سهرۆككۆمار و سهرۆك ئهركانهكهشی كورد بێت، ئهوه رۆتینه و 50 ساڵ پێش ئێستاش كورد له بهغداد پله و پایه و شالیار و وهزارهتخانهی ههبووه، جێگری سهدام كورد و جێگری ئهتاتوركیش ههر كوردبوو، دەیان پۆستی باڵای دیکە، بیركردنهوهی سهپاندنی دهسهڵات بۆ سهر ئهم ههرێمه بە تەنیشت پۆستی باڵای کوردەکانەوە دزەی کرد، هێشتا خەونی فاشیزم و دژە ئازادی و دیموکراسی له خهیاڵدانی نوخبەیەکی دەسەڵاتداردایە، كهواته دهبێت خهیاڵدانهكه بگۆڕێت ئینجا هەڵبژاردن تامی خۆی هەیە، ئهگهرنا دهبێت بگهڕێینهوه بۆ مهنتیقی شۆڕشی ئەیلوول و گوڵان و نوێ و بهردهقارهمان، کورد توانای ههبێت دەبێ دهستكاری عهقڵیهتهكان بكات، دهنگ و كورسی پهرلهمان هیچ نییه تۆ ههر نهتهوهی دووهمیت، ماف و خواست و فیدراڵی بۆ نەتەوەی دووەم هەڵبژاردن و پەنجا کورسی پەرت و بڵاوی حیزبی و راجیاواز زامنی ناکات، بە گۆڕینی ئەو میتۆد و مۆدیلە دەبێت، کە هێشتا عێراقی پێوە پەیوەستە.
.jpg&w=3840&q=75)
