دوورگەی گەنجینە، چیرۆکی کتێبی ئینگلیزی پۆلی 12 دەکرێتە زنجیرەیەکی نوێ

رووداو دیجیتاڵ 

چیرۆکی بەناوبانگی دوورگەی گەنجینە Treasure Island کە یەکێکە لە بابەتە سەرەکییەکانی بەشی ئەدەبیی کتێبی ئینگلیزیی پۆلی 12ی ئامادەیی لە هەرێمی کوردستان، دەکرێتە کورتەزنجیرەیەکی شەش ئەڵقەیی و بڕیارە مانگی تشرینی یەکەمی ئەم ساڵ پەخش بکرێت.

چیرۆکەکە لە بنەڕەتدا رۆمانێکی کلاسیکیی نووسەری ناوداری سکۆتلەندی (رۆبێرت لویس ستیڤنسۆن)ـە و پێشتریش چەندین جار کراوەتە فیلم و ئەنیمەیشن. لەم بەرهەمە نوێیەدا، کەسایەتییە ناسراوەکانی وەک لۆنگ جۆن سیلڤەر، جیم هۆکینز، ئارۆن گراهام و بیلی بۆنز بە کەشێکی درامی و تاریکتر دەردەکەونەوە.

جیاوازیی زنجیرەکە لەگەڵ چیرۆکەکەی پۆلی 12 چییە؟

لە پڕۆگرامی خوێندنی پۆلی 12دا، دایکی جم (بێس) تەنیا لە ئەڵقەی 1 و 2 دا هەیە، کاتێک لەگەڵ جم سندووقەکەی بیلی بۆنز دەکەنەوە و پارەی کرێی مەیخانەکەی لێ دەبات، دواتر لە بەندەرەکە جێدەمێنێت و لە گەشتە دەریاییەکەدا نامێنێت.

لەم وەشانە نوێیەدا، گۆڕانکارییەکی گەورە لە چیرۆکەکەدا کراوە، ئەکتەری بەناوبانگ هەیڵی ئاتوێڵ رۆڵی دایکی جم دەگێڕێت و دەبێتە یەکێک لە کارەکتەرە سەرەکییەکان و لەگەڵ کوڕەکەیدا دەچێتە سەر کەشتیی هیسپانیۆلا و یاوەریی دەکات بۆ دۆزینەوەی گەنجینەکە. 

زنجیرەکە لە شەش ئەڵقە پێکدێت و لە نێوان سێ دەرهێنەردا دابەش کراوە:

جێرمی لۆڤەرینگ دەرهێنانی بۆ ئەڵقەکانی 1 و 4 کردووە.
ویلیام مەکگرێگۆر دەرهێنانی بۆ ئەڵقەکانی 2 و 3 کردووە.
پۆڵ واکەر دەرهێنەری دوو ئەڵقەی کۆتایی (5 و 6) بووە.

جیاوازی و کەشی ئەم زنجیرەیە

رووداوەکانی زنجیرەکە بینەر دەبەنەوە بۆ ساڵی 1788. جم هۆکینزی گەنج و دایکە پێداگرەکەی بە رێکەوت نەخشەی گەنجینە ئەفسانەییەکەی (کاپتن فلینت)ـیان دەکەوێتە دەست و تووشی سەرکێشی و تووندوتیژی دەبن لەپێناو بەدەستهێنانی سەروەت و سامانێکی خەیاڵیدا.

زنجیرەکە جیاواز لە وەشانە کلاسیکی و کارتۆنییەکانی پێشوو، زیاتر تیشک دەخاتە سەر تووندوتیژیی راستەقینەی چەتەکان و مەترسییەکانی زەریای ئەتڵەسی. هەروەها تەنیا ململانێی چەتەکان نییە، بەڵکو سیخوڕێکی شاهانەی بەریتانی بە ناوی (ئارۆن گراهام) بە هەمان شێوە هەوڵی بەدەستهێنانی گەنجینەکە دەدات، جم و دایکیشی لە نێو ئەم ململانێیەدا بۆ مانەوە لە ژیاندا دەجەنگن.

بڕیارە زنجیرەکە لە 11ـی تشرینی یەکەمی 2026 لەسەر پلاتفۆرمی +MGM لە ئەمریکا و لە 12ـی تشرینی یەکەم لەسەر پلاتفۆرمی+Paramount  لە بەریتانیا و جیهان دەست بە پەخشکردنی بکرێت.