ئاشكرایە كە كێشەی كورد لە توركیا ، تەمەنی 100 ساڵی تێپەڕاندووە. لانیكەم چ لە سایكس بیكۆوە، كە بڕیاری پارچە پارچەكردنی كوردستانی دا و چ لە لۆزانیشەوە ـ 1923 ـ كە ئەو بڕیارەی تێدا جێبەجێ كرا. بەدڵنیاییەوە تا ئەم كێشەیەش یەكلایی نەكرێتەوە، توركیا ئۆقرەیی و ئاسایشی تەواو بەخۆیەوە نابینێ. بۆیە زۆر گرنگە پاش شكستی كودەتاكەی 15ی تەمموز و كۆتاییهێنان بە مەترسییەكانی ئەو كودەتایە، ئەردۆغان و پارتەكەی و كۆی فەرمانڕەوایی توركیا ، ئەولەویەتی یەكەمیان گەڕانەوە بێت بۆ پرۆسەی ئاشتی و هەنگاونان بەرەو چارەسەری بنەڕەتی ئەم پرسە.
راستە ئەگەری ئەوە هەیە كە (ئاكپارتی) متمانەی تەواوی بە سەركردایەتی (هەدەپ) و خودی سەلاحەدین دەمیرتاشی سەرۆكی نەبێ، بەڵام ئەمە ناكاتە ئەوەی كە پرسی كورد لەو وڵاتە پشتگوێ بخرێ ، یان بەهەند وەرنەگیرێ. ئاخر ئەمە پرسی هەدەپ نییە، پرسی تەنیا پەكەكەش نییە، پرسی گرووپ و هۆز و عەشیرەت یان ناوچەیەك نییە، بەڵكو پرسی خاكێكی پان و بەرین و گەلێكی 25- 30 ملیۆنییە، پرسی دووەمین نەتەوە و پێكهاتەی توركیایە كە 100 ساڵە بە (توركی شاخاوی و كورمانج) و شتی تر ناوزەد دەكرێ .
پرسی گەلێكی بەشدارە لە هەموو دەسكەوت و سەروەرییە مێژووییەكانی گەلانی توركیا و ناوچەكە، چ لەسەردەمی خەلافەتی عوسمانی و چ لەسەردەمی كۆماری نوێی توركیادا.
ئەم پرسە چیتر قابیلی پشتگوێخستن نییە، بۆیە ئەردۆغان و حیزبەكەی كە لەسەردەمی حوكمڕانیی ئەواندا كرانەوەی بەرچاو بەڕووی كورد و كوردستانی باكووردا بەدیهات و زۆر هەنگاویان لە بواری رۆشنبیری و میدیا و خوێندن و شتی دیكەدا ناوە، نابێ پاشگەز ببنەوە لە هەنگاوەكان، بەڵكو پێویستە بەدەستپێشخەریی سیاسی نوێ و بە جورئەتی تەواوەوە بێنەوە سەرخەت و لەگەڵ دوو حیزبە ئۆپۆزسیۆنەكەی دیكەشدا، راشكاوانە لەسەر ئەم پرسە، وەك پرسێكی نیشتمانیی گرنگ و هەستیاری گەلانی توركیا قسەی لەسەر بكەن.
نابێ ئەگەر ئاكپارتی نیگەرانی لە هەدەپ یان هەر گرووپێكی دیكە هەبێت، لەچاوی هەدەپ و ئەوانەوە سەیری پرسی كورد بكات و هەڵوێستی بەرامبەر وەربگرێت، بەڵكو بە پێچەوانەوە پێویستە لە چاوی ئەم پرسە گرنگ و گەورە و مێژووییەوە تەماشای هەدەپ و پەكەكە بكات، چونكە ئەم پرسە بوو ئەوانی دروستكرد و هێنایە بوون، نەك پێچەوانەكەی .
.avif&w=3840&q=75)
