ئاشتی و دادپەروەری كۆمەڵایەتی و مافەكانی مرۆڤ و بەشداریی ژن لە پرۆسەی سیاسی و كۆمەڵایەتی و ئابووری پێوەری بنەڕەتین لە سیستەمی دیموكراسیدا، هەڵسەنگاندنی هەر وڵات و كۆمەڵگەیەك، بەپێی ئەو پێوەرانە دەبێت. لەكاتی بانگەشەی هەڵبژاردنەكانی كوردستان هەموو چەكێكی نادیموكراسی بەكارهات، تا گەیشتە ناوزڕاندن و یاریكردن بە عەقڵی دەنگدەر و سەرلێشێواندنی لە پێناوی بەدیهێنانی چەند كورسییەكی زیاتر و لێدانی ئەوانی دی، ئەوە تەنیا دەنگدەری هۆشیارە كە دەتوانێ بۆخۆی شتەكان هەڵسەنگێنێ و بڕیاری دروست بدات. ئایا بوون بە حاكمی وڵاتێك لە سیستەمێكی دیموكراسیدا پێویستی بەوە هەیە هەمووان ناشیرین بكەی بۆ ئەوەی بگەیتە دەسەڵات و پارە، باشە ئەگەر كولتوور و رۆشنبیری لەم ئاستە نزمەدا بێت، چۆن منی دەنگدەر خەون بە ژیانێكی باشترەوە ببینم دوای هەڵبژاردنەكان.
لە كوردستان باس لە سیستەمی دیموكراسی دەكرێت، بەڵام ئێمە ئەو عەقڵیەتەمان نەبینی و هەستمان پێنەكرد، نەمانبینی لایەنە سیاسییەكانی بەشداربووی هەڵبژاردنەكانی پەرلەمانی كوردستان بە ناردنی بروسكە یان لەڕێی كەناڵەكانی راگەیاندنەوە پیرۆزبایی لەیەكتری بكەن و ئەنجامی هەڵبژاردنەكان قبووڵ بكەن و بە رۆحێكی نەتەوەیی هەوڵی پێكهێنانی كابینەی نوێی حكومەت بدەن.
راستە دانپێدانان بە دۆڕاندن ئەستەمترە لە خودی دۆڕان، بەڵام دۆڕاندن كۆتایی دونیا نییە، سیستەمی دیموكراسیش ئاوا دەخوازێ. ئێستا بە پێچەوانەوە هەندێك لایەن وەك خۆیان دەڵێن ئەوەی راگەیێندراوە دەنگی ئەوان نییە و دەنگی ئەوان زۆر لەوە زیاترە! ئەم عەقڵە وا لەدەنگدەر دەڕوانێ كە موڵكی خۆیەتی و دەبێ تا مردن لەسەر فڵان حیزب تاپۆ بێت. ئەم ئاماژانە پێماندەڵێن ئێمە هێشتا نامۆین بە كولتووری دیموكراسی و ناتوانین سیستەمێكی دیموكراسی بنیات بنێین و یەكتری قبوڵ بكەین. ئەمەش مانای ئەوەیە ئێمە سفرمان بەدەستهێناوە لە تاقیكردنەوەی دیموكراسی، بەڵام دەبێ لەگەڵی بژین.
كوردستان لە هەنگاوەكانی سەرەتادایە بەرەو دیموكراسی، ئەو رێگایەش پێویستی بە گەشەی كۆمەڵایەتی و ئابووری و سیاسی و رۆشنبیری هەیە. دیموكراسی لە لەتێك نانەوە دەستپێدەكات تاوەكو دەگاتە پێداویستییە بنەڕەتییەكانی مرۆڤ ، دیموكراسی رۆشنبیرییە بەرلەوەی هەڵبژاردن بێت، دیموكراسی جیا نییە لە مێژووی بەرەوپێشچوونی هەر نەتەوەیەك . لاوازیی سیستەمی دیموكراسی لە كوردستان بەندە بەمەرگی فكر و مەرگی نوخبەوە. ئەو رۆشنبیرییەی لای ئێمە هەیە رۆشنبیری دەزگاكانی حیزب و كۆمەڵگەیە، ئەو كۆمەڵگەیەی كە رۆشنبیری كورد دوای عەقڵی كەوتووە نەك بە پێچەوانەوە. ئێستا خەڵكی كوردستان لە چاوەڕوانی پێكهێنانی كابینەی نوێدان. سیناریۆكان جۆراوجۆرن و كۆبوونەوەكان لە پشتی پەردەوە دەكرێن و هاووڵاتیانیش لە ترس و دڵەڕاوكێدا دەژین، دەترسم لەم ئەزموونەش سفر بهێنین.
