سوپای پاسداران کوژرانی عەلیڕەزا تەنگسیری راگەیاند

لە راگەیێندراوەکەی سوپای پاسداراندا هاتووە، تەنگسیری دوای ئەوەی سەرپەرشتی چەندین هێرشی کرد بۆ سەر ژێرخانەکانی "دووژمن" و خستنەخوارەوەی فڕۆکەیەکی جەنگیی ئەمریکی، لە کاتی رێکخستنەوەی هێزەکان و بەهێزکردنی قەڵخانی بەرگریی دوورگە و کەناراوەکانی ئێران، بە سەختی بریندار بوو و دواتر بەهۆی سەختیی برینەکانیەوە گیانی لەدەستدا.

سوپای پاسداران باس لەوە دەکات کوژرانی فەرماندە باڵاکانیان نابێتەهۆی وەستانی ئۆپەراسیۆنەکانیان و رایگەیاند: "هەروەک چۆن بە کۆچی رێبەرانی مەزنی وەک ئایەتوڵڵا خومەینی و ئایەتوڵڵا خامنەیی، رێڕەوی شۆڕش نەوەستا، بە شەهیدبوونی فەرماندە مەیدانییەکانیش کارەکانمان بەهێزتر دەبن."

لە بەشێکی دیکەی راگەیێندراوەکەدا هاتووە، سەربازانی هێزی دەریایی سوپا گورزی جەرگبڕیان لە "دووژمن" داوە و بەردەوامن لە بەڕێوەبردنی مەیدانی جەنگ لە تەنگەی هورمز.

سوپای پاسداران کوژرانی ئەم فەرماندەیەی وەک داستانێکی نیشتمانی ناوبردووە و لە کۆتایی راگەیێندراوەکەدا هاتووە: "لەگەڵ گەلی ئێران بەڵێن نوێ دەکەینەوە کە تاوەکو لەنێوبردنی تەواوەتیی دووژمن و رزگارکردنی قودسی شەریف، لە تێکۆشان ناوەستین."

عەلیڕەزا تەنگسیری یەکێک بوو لە کەسایەتییە دیارە سەربازییەکانی ئێران و بۆ چەندین ساڵ فەرماندەیی هێزی دەریایی سوپای پاسدارانی لە ئەستۆ بوو، بەتایبەتی لە ناوچە هەستیارەکانی کەنداو و تەنگەی هورمز.

- ساڵی 1962 لە شاری تەنگستانی پارێزگای بوشەهر لەدایکبووە.

- پلەی سەربازییەکەی لەناو سوپای پاسداراندا  سەردار بوو.

- فەرماندەی هێزی دەریایی سوپای پاسداران بوو.

- لە ساڵی 2006 تاوەکو 2010 فەرماندەی ناوچەی یەکەمی دەریایی سوپای پاسداران لە بەندەر عەباس بووە.

- لە ساڵی 2010 تاوەکو 2018 جێگری فەرماندەی هێزی دەریایی سوپای پاسداران بووە.

- لە ساڵی 2018 تاوەکو ئەمڕۆ فەرماندەی گشتی هێزی دەریایی سوپای پاسدارانە.

- ساڵی 2019 بە تۆمەتی تێوەگلان لە تێکدانی ئاسایشی کەشتیوانی نێودەوڵەتی، خرایە لیستی سزادراوانی ئەمریکا.

- ساڵی 2023 بە تۆمەتی ناردنی سیستمی بەرگری ئاسمانی بۆ سووریا و درۆن بۆ رووسیا خرایە لیستی سزادراوانی یەکێتیی ئەورووپا.

-رۆژی 26ـی ئادار یسرایل کاتز، وەزیری بەرگریی ئیسرائیل کوژرانی تەنگسیری راگەیاند و ئەمڕۆ ئێران بە فەرمی پشتڕاستی کردەوە.