رووداو دیجیتاڵ
هاوپەیمانیی عەرەبی بە سەرۆکایەتیی سعودیە رایگەیاند، دوو درۆنی حووسییەکانی یەمەنی لە ئاسمانی ناوچەی ریاز و باشووری وڵاتەکە تێکشکاندووە.
رۆژی شەممە 14-11-2026، تورکی مالیکی، گوتەبێژی هاوپەیمانیی عەرەبی لە پۆستێکدا لە ئێکس بڵاویکردەوە، "دوو درۆن کە لەلایەن میلیشیای تیرۆریستیی حووسییەوە هاوێژرابوون، لە ناوچەی ریاز و ناوچەکانی باشوور رێگرییان لێکرا و تێکشکێندران."
هاوپەیمانییەکە کە لە جەنگی دژی حووسییەکاندا پشتیوانی لە حکومەتی دانپێدانراوی نێودەوڵەتیی یەمەن دەکات، لە مانگی تەممووزی ئەم ساڵەوە و دوای هەڵگیرسانەوەی شەڕ و پێکدادانەکان، رووبەڕووی شەپۆلێکی چڕی هێرشەکان بووەتەوە.
لە چەند هەفتەی رابردوودا حووسییەکان چەندین شوێنیان لەنێو سعودیە کردووەتە ئامانج، لەوانە فڕۆکەخانەکان، ژێرخانی وزە، بنکە سەربازییەکان و ناوچەی دارایی ریاز، بەتایبەتیش فڕۆکەخانەی نێودەوڵەتیی پایتەختی سعودیە.
رۆژی یەکشەممەی رابردووش، بەهۆی هێرشێکی حووسییەکانەوە زیان بەر باڵەخانەیەکی بەرز کەوت کە سەر بە کۆمپانیای نەوتی سعودیە (ئارامکۆ) بوو لە ناوچەی دارایی ریاز.
بەپێی ئاماری دەسەڵاتدارانی سعودیە، لە مانگی ئەیلوولەوە تاوەکو ئێستا 26 کەس لە هێرشەکانی سەر ئەو وڵاتەدا کوژراون، کە 23 کەسیان لە هێرشی سەر فڕۆکەخانەکاندا بوون.
لە بەرامبەردا، حووسییەکان بە بەردەوامی باس لە هێرشی ئاسمانیی سعودیە بۆ سەر ئەو ناوچانەی یەمەن دەکەن کە لەژێر کۆنترۆڵی ئەواندان.
جەنگی یەمەن سەرەتا لە ساڵی 2014 سەریهەڵدا، کاتێک حووسییەکان دەستیان بەسەر سەنعای پایتەختدا گرت و حکومەتیان ناچارکرد بەرەو عەدەن پاشەکشە بکات؛ زیاتر لە 10 ساڵیشە هاوپەیمانیی عەرەبی بە سەرۆکایەتیی سعودیە پشتیوانی لە حکومەتی یەمەن دەکات.
بەگوێرەی ئامارەکانی نەتەوە یەکگرتووەکان، لە دوای هەرەسهێنانی ئاگربەستە چوار ساڵییەکەی یەمەن لە هاوینی ئەم ساڵدا، زیاتر لە هەزار و 600 کەس کوژراون و زیاتر لە 300 هەزار کەسی دیکەش ناچاربوون ماڵ و حاڵی خۆیان جێبهێڵن.
