رووداو دیجیتاڵ
سەرۆکی پەرلەمانی ئێران رایدەگەیێنێت، ئیسرائیل هەموو هەوڵێک دەدات تاوەکو واشنتن پەلکێشی جەنگێکی بێکۆتایی لە دژی تاران بکات و هۆشداریش دەدات ئەگەر ئەمریکا بەئاگا نەیەتەوە، بەرەو "چاخی تاریکی" هەنگاو دەنێت.
ئەمڕۆ دووشەممە، 9ی تشرینی دووەمی 2026، محەممەد باقر قالیباف لە پەیامێکدا لە تۆڕی کۆمەڵایەتیی ئێکس نووسی: "ئیسرائیلییەکان هەموو هەوڵی خۆیان دەدەن بۆ ئەوەی ویلایەتە یەکگرتووەکانی ئەمریکا پەلکێشی جەنگێکی بێکۆتایی لەگەڵ ئێران بکەن؛ ئەمەش زەلکاوێکە کە هیچ سەرۆکێک، نە لە ئێستا و نە لە داهاتوودا، نە لە دیموکراتەکان و نە لە کۆمارییەکان، ناتوانێت لێی دەربازی ببێت."
سەرۆکی پەرلەمانی ئێران رووی هۆشدارییەکانی کردە کۆشکی سپی و گوتی: "ئەگەر واشنتن دەستبەرداری شێوازی بیرکردنەوەی 'سەرەتا ئیسرائیل' نەبێت، ئەوا ئەمریکا و هاوپەیمانەکانی راستەوخۆ بەرەو چاخێکی تاریک هەنگاو دەنێن."
ئەم هۆشدارییەی قالیباف هاوکاتە لەگەڵ ئاشکرابوونی وردەکاریی سەردانە کتوپڕ و چەند کاژێرییەکەی عەلی فالح زەیدی، سەرۆکوەزیرانی عێراق بۆ تاران؛ لەو دیدارەدا سەرۆکی پەرلەمانی ئێران پێشوازی لە هەوڵە دیپلۆماسییەکانی عێراق کرد بۆ راگرتنی شەڕ، بەڵام جەختی لەوە کردەوە کە سەرکەوتنی "پڕۆژەی دوو رۆژە"ـی ئێران بۆ هێورکردنەوەی دۆخەکە بەندە بەوەی ئەمریکا سزاکان هەڵبگرێت و گەمارۆی دەریایی کۆتایی پێبهێنێت.
لە چەند رۆژی رابردووشدا نێوەندگیرانی قەتەری کۆمەڵێک پێشنیازی نوێیان لەبارەی سنووردارکردنی پیتاندنی یۆرانیۆم خستووەتە بەردەم تاران بۆ ئەوەی رێگە لە دەستپێکردنەوەی شەڕێکی فراوانتر بگرن. لە بەرامبەردا، ئیسرائیل هۆشداری دەدات لەوەی بانکێکی ئامانجی هەستیار و ئابووریی ئێرانی بۆ لێدانی ئاسمانی ئامادە کردووە.
هاوکات، بەرپرسانی باڵای ئەمریکا بە کەناڵی "فۆکس نیوز"ـیان راگەیاندووە، دۆناڵد ترەمپ سەرۆکی ئەمریکا رۆژی پێنجشەممەی رابردوو لەگەڵ تیمی ئاسایشی نیشتمانی کۆبووەتەوە بۆ تاوتوێکردنی دەستپێکردنەوەی ئۆپەراسیۆنە سەربازییەکان بۆ سەر ئێران؛ بە گوتەی بەرپرسانی واشنتن، کەشوهەوای رۆژی دووشەممە 9ی تشرینی دووەمی رۆژهەڵاتی نێوەڕاست گونجاوە بۆ ئەوەی تێیدا هێرش بکرێتەوە سەر ئێران.
