قالیباف: تاوەکو 7 مەرجەکەمان قبووڵ نەکرێت هیچ پێشکەوتنێک روونادات

رووداو دیجیتاڵ

محەممەد باقر قالیباف، سەرۆکی پەرلەمانی ئێران نووسیویەتی، سیاسەتی سزادان کاریگەری لەسەر وڵاتەکەیان نابێت.

قالیباف جەخت دەکاتەوە تەنیا لە کاتێکدا پێشکەوتن لە رێککەوتنەکاندا دروست دەبێت کە لایەنی بەرامبەر بە تەواوی رەزامەندی لەسەر 7 مەرجەکەی تاران بدات.

رۆژی پێنجشەممە، 29ـی تشرینی یەکەمی 2026، سەرۆکی پەرلەمانی ئێران لە تۆڕی کۆمەڵایەتیی ئێکس نووسیویەتی، ئێران مەرجەکانی خۆی زۆر بە روونی و چەندین جار بە نێوەندگیرەکان راگەیاندووە.

لە بەشێکی دیکەی پەیامەکەیدا قالیباف ئاماژە بە شێوازی مامەڵەی وڵاتانی رۆژئاوا دەکات و دەڵێت، سیاسەتی سزادان و ترساندن هیچ کاریگەرییەکی لەسەر ئێران نابێت.

ئەو بەرپرسە ئێرانییە دووپاتی دەکاتەوە تەنیا کاتێک پێشکەوتن بەدەست دێت کە ئەو لایەنانە حەوت مەرجەکەی تاران قبووڵ بکەن.

حەوت مەرجەکەی تاران کە لە کۆتایی مانگی ئەیلوولی 2026 لە نیویۆرک و لە رێگەی نێوەندگیرەکان پێشکەش کرا، بریتین لە کۆتاییهێنان بە هەموو کردەوە سەربازییەکان لە سەرجەم بەرەکان، هەڵگرتنی گەمارۆی دەریایی سەر بەندەرەکانی ئێران، هەڵگرتنی سزا لەسەر هەناردەکردنی نەوت، ئازادکردنی پارە بلۆکراوەکان، هەڵگرتنی سزاکانی یەکلایەنە و دڵنیاکردنەوە لە تێپەڕینی سەلامەتیی کەشتییە بازرگانییەکان لە تەنگەی هورمز.

جەنگی نێوان ئەمریکا - ئیسرائیل لەگەڵ ئێران لە 28ـی شوباتی 2026 بە هێرشی ئەمریکا و ئیسرائیل بۆ سەر تاران دەستی پێکرد، ئێرانیش لە بەرامبەردا هێرشی کردە سەر بنکەکانی ئەمریکا لە ناوچەکە و تەنگەی هورمزی داخست.

ئاگربەستێک لە 7-8ـی نیسان راگەیێندرا، بەڵام لە 13ـی نیسان ئەمریکا گەمارۆی خستە سەر بەندەرەکانی ئێران و بە ئەمەش ئاگربەستەکە شکێندرا.

لە 17-18ـی حوزەیرانی 2026 لە ئیسلامئاباد لێکتێگەیشتنێکی (14 خاڵ)ـی واژۆ کرا کە ئاگربەست و هەڵگرتنی گەمارۆی دەریایی لە ماوەی 30 رۆژدا و دانوستاندنی 60 رۆژە بۆ رێککەوتنی کۆتایی لەخۆ دەگرت، بەڵام ئەم لێکتێگەیشتنە لە 8ـی تەممووز شکستی هێنا دوای هێرش بۆ سەر کەشتییەکان و گەمارۆکە لە 14ـی تەممووز دووبارە دانرایەوە.