رووداو دیجیتاڵ
فەرماندەیی ناوەندیی هێزەکانی ئەمریکا (سێنتکۆم) رایگەیاند، بە فەرمانی دۆناڵد ترەمپ، سەرۆکی ئەمریکا، شەپۆلێکی نوێی هێرشە ئاسمانییەکانیان بۆ سەر ئامانجەکانی نێو خاکی ئێران دەستپێکردووەتەوە. ئەمەش دوای ئەوە دێت کە لە هێرشێکی پێشتری ئێران دا بۆ سەر ئوردن، دوو سەربازی ئەمریکی کوژران و یەکێکی دیکەش بێسەروشوێن بوو.
سێنتکۆم لە راگەیێندراوێکدا ئاماژەی بەوە کردووە، هێرشەکان [کاژێر 01:00ی بەرەبەیان بە کاتی هەولێر دەستیان پێکردووە] و ئامانج لێیان "لاوازکردنی تواناکانی ئێرانە بۆ هەڕەشەکردن لە کەشتیوانیی بازرگانی لە تەنگەی هورمز و سزادانی سوپای پاسدارانە" کە بەرپرسن لە هێرشەکەی سەر سەربازانی ئەمریکا لە ئوردن.
هەڕەشەکانی تاران و وەڵامی واشنتن
پێش دەستپێکردنی هێرشەکان، موجتەبا خامنەیی، رێبەری باڵای ئێران، هۆشداریی دابووە واشنتن و رایگەیاندبوو کە ئەمریکا باجی "هەوڵدان بۆ پەرەپێدانی ململانێکان" دەدات. خامنەیی واژۆی دۆناڵد ترەمپی بە "بێ بایەخ و بێ متمانە" ناوبرد و هۆشداریی لە "شکستی گەورەتر" بۆ ئەمریکا دا.
لە بەرامبەردا، پیت هێگسس، وەزیری بەرگریی ئەمریکا لە هەژماری خۆی لە تۆڕی کۆمەڵایەتیی ئێکس نووسیویەتی: "قوربانیدانی سەربازەکانمان تەنیا ورەمان بۆ رووبەڕووبوونەوە بەهێزتر دەکات."
فراوانبوونی شەڕ بۆ وڵاتانی کەنداو
گرژییەکان تەنیا لەنێوان واشنتن و تاران نەماونەتەوە، بەڵکو چەند وڵاتێکی ناوچەکەشیان گرتووەتەوە:
کوێت؛ سوپای پاسداران رایگەیاند کە هێرشی کردووەتە سەر سەنتەری پاڵپشتیی سەربازیی ئەمریکا لە "کامپ عارفجان" و بنکەی ئاسمانیی "عەلی سالم". لای خۆیەوە کۆمپانیای نەوتی کوێت پشتڕاستی کردەوە کە یەکێک لە دامەزراوە نەوتییەکانیان زیانی بەرکەوتووە.
بەحرێن؛ میدیاکانی ئێران دەڵێن بنکەی ئاسمانیی "شێخ عیسا" کە فڕۆکە جەنگییەکانی ئەمریکای لێیە، کراوەتە ئامانج.
ئوردن؛ تەلەڤیزیۆنی فەرمیی ئێران رایگەیاند، لە هێرشێکی درۆنی دا بۆ سەر بنکەیەکی ئەمریکا لە (ئەزڕەق)، دوو فڕۆکەی جەنگیی ئەمریکی تێکشکێنراون.
سعودیە؛ زەنگی مەترسی لە ناوچەکانی (ئەلخەرج) و (یەنبوع) لێدراوە و داوا لە دانیشتووان کراوە بچنە پەناگەکان، دوای ئەوەی هێرشێکی مووشەکی بۆ سەر ناوچەکە ئەنجامدرا.
جەنگ بۆ کۆنترۆڵکردنی تەنگەی هورمز
ئەم ململانێیە کە لە مانگی شوباتەوە دەستیپێکردووە، ئامانجی ئەمریکا و ئیسرائیل تێیدا پەکخستنی بەرنامەی مووشەکیی ئێران و گرووپە وەلائییەکانیەتی. ئێستا شەڕەکە گەیشتووەتە قۆناخی کۆنترۆڵکردنی تەنگەی هورمز، کە رێڕەوی پێنجەکی نەوتی جیهانە.
ئێران ئەمریکا تۆمەتبار دەکات بەوەی دەیەوێت دەست بەسەر گەرووەکەدا بگرێت، لە کاتێکدا ئەمریکا دەڵێت تەنیا گەمارۆی دەریایی دەخاتە سەر ئێران. یەکێتیی ئەورووپا و وڵاتانی کەنداو لە راگەیێندراوێکی هاوبەشدا داوایان لە ئێران کردووە دەستبەجێ هێرشەکانی بۆ سەر کەشتیوانی رابگرێت و گەرووەکە بە کراوەیی بهێڵێتەوە.
ئاماری قوربانییەکان
بەگوێرەی ئامارە فەرمییەکان:
تاوەکو ئێستا 16 سەربازی ئەمریکی لە دەستپێکی شەڕەکەوە کوژراون و زیاتر لە 420ی دیکەش بریندار بوون.
وەزارەتی تەندروستیی ئێران رایگەیاندووە، لە سێ هەفتەی رابردوودا 50 کەس لە هێرشەکانی ئەمریکادا کوژراون و زیاتر لە 500 کەسیش بریندار بوون.
