رووداو دیجیتاڵ
سەرۆکایەتیی ئەنجوومەنی وەزیرانی هەرێمی کوردستان لە روونکردنەوەیەکدا دەڵێ، فالح فەییاز، سەرۆکی دەستەی حەشدی شەعبی لە کۆبوونەوەکانی دوێنێیدا لە هەولێر باسی لە "گرنگی چارەسەرکردنی کێشە هەڵپەسێردراوەکانی هەرێمی کوردستان و حکومەتی فیدراڵ کردووە".
ئەمڕۆ یەکشەممە 22ی تشرینی دووەمی 2026، سەرۆکایەتیی ئەنجوومەنی وەزیرانی هەرێمی کوردستان لە روونکردنەوەیەکدا رایگەیاند: "دوێنێ شەممە، لە سەردانی بەڕێز فالح فەییاز، سەرۆکی دەستەی حەشدی شەعبی بۆ هەرێمی کوردستان و دیدار و کۆبوونەوەکانی لەگەڵ بەڕێز جەنابی سەرۆک بارزانی و بەڕێزان کاک نێچیرڤان بارزانی، سەرۆکی هەرێمی کوردستان و کاک مەسرور بارزانی، سەرۆکی حکومەتی هەرێمی کوردستان، گفتوگۆیان لەبارەی گرنگیی چارەسەرکردنی کێشە هەڵپەسێردراوەکانی هەرێمی کوردستان و حکومەتی فیدراڵ کرد، بەتایبەتی بودجە، نەوت و دەروازە سنوورییەکان".
لە روونکردنەوەکەدا هاتووە: "بەڵام لە هەندێک لە دەزگاکانی راگەیاندن دەنگۆی ناڕاست و هەڵبەستراویان لەبارەی نێوەڕۆکی کۆبوونەوەکە بڵاوکردووەتەوە کە هیچ بنەمایەکیان نییە و دوورن لە راستی".
سەرۆکایەتیی ئەنجوومەنی وەزیرانی هەرێمی کوردستان دەڵێ: "بە پێچەوانەوە، هەموو لایەک هاوڕابوون لەسەر ئەوەی پێویستە کێشەکانی نێوان هەرێمی کوردستان و حکومەتی فیدراڵ، بە گفتوگۆ و لێکتێگەیشتنی هاوبەش و لە چوارچێوەی دەستوور چارەسەر بکرێن".



