رووداو دیجیتاڵ
بەڕێوەبەری ناحیەی تەناهی لە سنووری قەزای سێمێل لە پارێزگای دهۆک دەڵێ، بەهۆی پێگەی ستراتیجی و نزیکبوونیان لە شاری دهۆک، چەندین پڕۆژەی رێگەسازی، خزمەتگوزاری و وەبەرهێنان لە سنوورەکەدا کەوتوونەتە واری جێبەجێکردنەوە و پلانی نوێش بۆ ئاوەدانکردنەوەی زیاتر دانراون.
شەعبان خەلیل، بەڕێوەبەری ناحیەی تەناهی، میوانی پۆدکاستی (بە کاتی دهۆک) بوو لە رادیۆی رووداو و تیشکی خستە سەر دۆخی کارگێڕی و گۆڕانکارییە خزمەتگوزارییەکانی دەڤەرەکە و رایگەیاند: "دوای هێنانەکایەی ناحیەکە، گرنگترین ئامانجمان خزمەتکردنی هاونیشتمانییان و پەرەپێدانی ژێرخانی ئابووری و شارستانی بووە لە سنوورەکەدا."
لەبارەی پڕۆژەکانی رێگەسازی و کەمکردنەوەی قەرەباڵخی، بەڕێوەبەری ناحیەی تەناهی ئاماژەی بەوە کرد کە چەندین رێگەی سەرەکی و ستراتیجی، لەوانەش هێڵەکانی هاتووچۆ کە دەڤەرەکە بە دهۆک و سێمێلەوە دەبەستنەوە، فراوان کراون و قیرتاوکردنی شەقامە لاوەکییەکان و خزمەتگوزارییەکانیش بەردەوامە.
شەعبان خەلیل ئەوەشی خستەڕوو، لە درێژەی کارە خزمەتگوزارییەکاندا، بودجەی پێویست بۆ چەندین پڕۆژەی ژێرخان و نۆژەنکردنەوەی رێگاوبان تەرخان کراوە، بە جۆرێک کە ئەوە کاریگەریی ئەرێنی لەسەر ئاسانکاریی هاتووچۆی هاونیشتمانییان و کەمکردنەوەی ترافیک دەبێت.
سەبارەت بە ئاماری دانیشتووانی سنوورەکە و پرسی دابەشکردنی پارچە زەوی بەسەر فەرمانبەران و هاونیشتمانییاندا، بەڕێوەبەری ناحیەکە روونیکردەوە که ژمارەی دانیشتووانی سنووری ناحیەی تەناهی روو لە زیادبوونە و نزیکەی 85 هەزار کەس دەبێت.
ئەو بەرپرسە سەبارەت بە دابەشکردنی زەوی ئاماژەی بەوە کرد کە لەگەڵ تەواوبوونی پاشکۆ و مۆڵەتە یاساییەکان و بە هاوئاهەنگی لەگەڵ لایەنە پەیوەندیدارەکانی پارێزگای دهۆک، هەوڵ دەدرێ مافی فەرمانبەران و شایستەکان لەبەرچاو بگیرێ و کێشەی نەبوونی زەوی بەسەر فەرمانگەکانی شارەوانیدا چارەسەر بکرێت، بە جۆرێک کە بە شێوازێکی دادپەروەرانە بەسەر ناوچە جیاوازەکاندا دابەش بن.
.jpg&w=3840&q=75)