رووداو دیجیتاڵ
سەرۆکایەتیی زانکۆی سەلاحەدین لە هەولێر دەڵێ، خوێندکارانی وەرگیراوی قۆناخی یەکەم لە زانکۆکەیان ئاگادار دەکەنەوە، ئەوانەی خۆیان تۆمار نەکردووە، دەرفەتێکی نوێیان پێدراوە بۆ ناوتۆمارکردن و دەتوانن سبەی سەردانی کۆلێژەکان بکەن.
سامان عەبدوڵڵا، بەڕێوەبەری راگەیاندنی زانکۆی سەلاحەدین، ئەمڕۆ چوارشەممە بە تۆڕی میدیایی رووداوی گوت: "کاتی ناوتۆمارکردن کۆتایی هاتووە، بەڵام لە بەرژەوەندیی قوتابیانی قۆناخی یەک، ئەوانەی نەیانتوانیوە خۆیان تۆمار بکەن، بڕیار درا کە سبەی سەردانی کۆلێژەکان بکەن و ناویان تۆمار دەکرێ".
بەڕێوەبەری راگەیاندنی زانکۆی سەلاحەدین گوتی، دەستپێکردنی تۆماری ناوی وەرگیراوانی قۆناخی یەکەم لە زانکۆکەیان 7ی ئەم مانگە بووە و دوایین رۆژیش 18-10-2026 بووە؛ ئاماژەی بەوەکرد: "سبەی دوایین رۆژە و داواکارین هەر وەرگیراوێک بە هەر مەبەستێک نەیتوانیوە ناوی خۆی تۆمار بکات، سبەی سەردانی کۆلێژەکەی بکات و سوود لە دەرفەتەکە وەربگرێت".
زانکۆی سەلاحەدین بۆ ساڵی نوێی خوێندن 5 هەزار و 710 دەرچووی پۆلی 12ـی وەرگرتووە.
چوارشەممە 16-09-2026، سیستمی زانکۆلاین لە هەرێمی کوردستان کارا کرا و رۆژی شەممە 26-09-2026 وادەکەی کۆتایی هات، زیاتر لە 40 هەزار دەرچووی پۆلی 12 مافیان هەبوو داواکاری بۆ وەرگرتن لە زانکۆ حکومییەکان پێشکێش بکەن.
رۆژی 04-10-2026، وەزارەتی خوێندنی باڵا و توێژینەوەی زانستیی هەرێمی کوردستان ئەنجامی زانکۆلاینی راگەیاند و ئاماژەی بەوە کرد، 39 هەزار و 52 دەرچووی پۆلی 12 لە زانکۆ حکومییەکان وەرگیراون.
وەزارەتی خوێندنی باڵا رایگەیاند، 680 بەش لە هەرسێ جۆری خوێندنی (زانکۆلاین) و (پارالێڵ) و (ئێواران) بۆ ساڵی خوێندنی (2026 - 2027) لە 16 زانکۆی حکومی لە هەرێمی کوردستان قوتابی وەرگرتووە.
.jpg&w=3840&q=75)
