.jpg&w=3840&q=75)
رووداو دیجیتاڵ
بەڕێوەبەرایەتیی گشتیی چاودێری و گەشەپێدانی کۆمەڵایەتیی گەرمیان رایدەگەیێنێت، لە داهاتوویەکی نزیکدا دەست بە پرۆسەی دەرهێنانی مۆڵەتی شۆفێری بۆ نابیستان و خاوەنپێداویستییە تایبەتەکان لە سنووری ئیدارەی گەرمیان دەکرێت.
ژیلوان عادل شکور، بەڕێوەبەری گشتیی چاودێری و گەشەپێدانی کۆمەڵایەتیی گەرمیان، بە تۆڕی میدیایی رووداوی راگەیاند: "بە مەبەستی تاوتوێکردنی پرسی دەرهێنانی مۆڵەتی شۆفێری بۆ نابیستان و خاوەنپێداویستییە تایبەتەکان، سەردانی بەڕێوەبەرایەتیی هاتووچۆی گەرمیانم کرد و لەگەڵ عەمید شۆڕش عەلی رەشید، بەڕێوەبەری هاتووچۆی گەرمیان کۆبوومەوە."
بە گوتەی بەڕێوەبەری گشتیی چاودێری و گەشەپێدانی کۆمەڵایەتیی گەرمیان، ئەو هەنگاوە لە پێناو خزمەتکردنی زیاتری ئەو توێژەیە و بڕیار وایە لە داهاتوویەکی نزیکدا بە هەماهەنگی لەگەڵ لایەنە پەیوەندیدارەکان، پرۆسەکە بە فەرمی بچێتە بواری جێبەجێکردنەوە.
دوای بەرنامەی "لەگەڵ رەنج"ی تۆڕی میدیایی رووداو، بڕیار درا ئاسانکاری بۆ نابیستان و کەمبیستانی هەرێمی کوردستان بکرێت بۆ وەرگرتنی مۆڵەتی شۆفێری. لە هەولێر و سلێمانی، سەدان کەس ناوی خۆیان تۆمار کردووە و لایەنە پەیوەندیدارەکانیش بەڵێنی هاوئاهەنگیی تەواو دەدەن.
دوای پەخشکردنی بەرنامەکە، سەدان نابیست و کەمبیست لە هەرێمی کوردستان دڵخۆشن بەوەی کە ئاسانکارییان بۆ دەکرێت. لە هەولێر، زیاتر لە 100 کەس لە کۆمەڵەی نابیستان کۆبوونەوە بۆ تۆمارکردنی ناویان.
