رووداو دیجیتاڵ
ژنێکی تەمەن 58 ساڵ لە شاری هەولێر بەهۆی پەلاماردانی سەگی بێلانەوە بریندار بوو و گەیێندرایە نەخۆشخانە. بەڕێوەبەرایەتیی تەندروستیی هەولێریش دەڵێ، تەندروستیی جێگیرە.
رۆژی سێشەممە، 27ـی کانوونی یەکەمی 2026، سامان سەلمان، بەرپرسی راگەیاندنی بەڕێوەبەرایەتیی تەندروستیی هەولێر بە تۆڕی میدیایی رووداوی راگەیاند: "هاونیشتمانییەک گەیێندراوەتە نەخۆشخانەی فریاکەوتنی رۆژئاوای هەولێر، کە لەلایەن سەگی بێلانەوە پەلامار دراوە".
بەرپرسی راگەیاندنی تەندروستیی هەولێر ئاماژەی بەوە کرد: "ئەو هاونیشتمانییە ژنێکی تەمەن 58 ساڵە و خەڵکی دەڤەری باڵەکایەتییە، ئێستا لەژێر چاودێریی وردی پزیشکیدایە و باری تەندروستیی جێگیرە."
لە هەولێر شێڵتەرێکی سەگ لەلایەن پارێزگای هەولێرەوە بە گوژمەی زیاتر لە 480 ملیۆن دینار دروستکراوە و دەکەوێتە سەر رێگەی هەولێر - گوێڕ.
8-7-2023 وەکو یەکەم شوێن، لە گەڕەکی ژینی دارەتوو لە هەولێر، دەست بە کۆکردنەوەی سەگە بێلانەکان کرا. لەو کاتەوە تاوەکو مانگی تەمموزی ئەم ساڵ نزیکەی 26,000 سەگ کۆکراونەتەوە.
.jpg&w=3840&q=75)