رووداو دیجیتاڵ
بڕیارە لە دووەم ساڵیادی دەستگیرکردنیدا، گردبوونەوەیەکی ناڕەزایی بۆ پشتیوانی لاهوور شێخ جەنگی لە شاری هەولێر بەڕێوەبچێت.
قادر ئاغا مەنتک، یەکێک لە پارێزەرانی دەستگیرکراوانی لالەزار، ئەمڕۆ 20-08-2026 بە تۆڕی میدیایی رووداوی گوت: "گردبوونەوەکە شەممە 22ـی ئاب کاژێر 10:00ـی بەیانی لەبەردەم پەرلەمانی کوردستان بەڕێوەدەچێت".
لاهوور شێخ جەنگی، یەکەم جار 12-01-2026 برایە بەردەم دادوەر لە دادگەی سلێمانی، دوایین جاریش 14ـی مانگی ئایار بوو.
پارێزەرەکەی دۆسیەی لالەزار دەڵێت، گردبوونەوەکەیان بۆ ئەوەیە رێکارە یاساییەکانی دۆسیەی لالەزار دەستپێبکەنەوە و لەکاتی خۆیدا بەڕێوەببرێن.
قادر ئاغا مەنتک ئاماژەی بەوەکرد، بۆ گردبوونەوەکە مۆڵەتی یاساییان وەرگرتووە و گوتیشی: "هاوهەڵوێستانی کاک لاهوور و لایەنگرانی و هەموو توێژەکان لە گردبوونەوەکە بەشداری دەکەن".
لە 22ـی ئابی 2025، دوای رازینەبوونی لاهوور شێخ جەنگی بەوەی خۆی رادەست بکات، هێزە ئەمنییەکان هێرشیانکردە سەر هۆتێل لالەزار. دوای سێ کاژێر رووبەڕووبوونەوە، لاهوور شێخ جەنگی و پۆڵادی برای و ئەندامانی هێزەکەی لاهوور شێخ جەنگی دەستگیرکران.
لە پێکدادانەکەی 22ی ئابی 2025دا، ئەوەی بە فەرمی راگەیێندرا گیانلەدەستدانی پێنج کەس و برینداربوونی زیاتر لە 20 کەس بوو.
