رووداو دیجیتاڵ
وەزارەتی سامانە سرووشتییەکان و کارەبا لە راگەیێندراوێکی هاوبەشدا دەڵێن، ئەو کارەبایەی هەیە بەسەر پارێزگاکاندا دابەشدەکرێت و دڵنیاتان دەكەینەوە قەیرانی گازی ماڵان روونادات و كار دەكرێت بۆ گەڕانەوەی بەرهەمهێنانی كێڵگەی كۆرمۆر بە زووترین كات"
رۆژی پێنجشەممە کێڵگەی گازی کۆرمۆر بەهۆی هێرشە درۆنییەکان و مەترسی بۆ سەر کێڵگەکە، راگرتنی بەرهەمهێنانی گازی راگەیاند.
وەزارەتی کارەبا هەمان رۆژ رایگەیاند، بەرهەمهێنانی کارەبا بۆ 2500 مێگاوات کەمبووەتەوە.
ئەمڕۆ هەینی، وەزارەتی کارەبا و سامانە سرووشتییەکان لەبارەی دۆخی گاز و کارەباوە رایانگەیاند، تیمێکی هاوبەش لە هەردوو وەزارەت پێکهاتووە بۆ ئەوەی "كۆنترۆڵی دۆخەكە بكەن و بەشێوەیەكی رێكوپێک ئەو بڕە كارەبایەی هەیە بەسەر پارێزگا و ئیدارە سەربەخۆكان دابەش بكرێت".
لە راگەیێندراوەکەدا هاتووە، تیمێكی كۆنترۆڵی كارەبای هەرێم بەردەوام چاودێریی دۆخەكە و رێكخستنەوەی بەرهەمهێنان و گواستنەوەی كارەبا دەكات.
لەبارەی دابینکردنی گازی شلی ماڵانیش، دوو وەزارەتەکە دەڵێن، وەزیری سامانە سروشتییەكان رەزامەندیی وەزارەتی نەوتی فیدراڵی وەرگیراوە بۆ دابینکردن پێداویستیی رۆژانەی گازی ماڵان، هەر ئەمڕۆ چەندین تەنكەری گاز رەوانەی شارەكانی هەرێمی كوردستان دەکرێت".
هەردوو وەزارەتەکە دەڵێن، "هاووڵاتییان دڵنیا دەكەینەوە قەیرانی گازی ماڵان روونادات و كار دەكرێت بۆ گەڕانەوەی بەرهەمهێنانی كێڵگەی كۆرمۆر بە زووترین كات".
