رووداو دیجیتاڵ
(پڕۆژەی رووناکی) کە ئەرکی بریتییە لە دابینکردنی کارەبای 24 کاژێری دەڵێ، هاوینی ئەم ساڵ کارەبای هەموو هەرێمی کوردستان دەبێتە 24 کاژێری.
بەگوێرەی پڕۆژەکە بۆ رووداو، سنووری ئیدارەی گەرمیان، قەزاکانی دەربەندیخان، پێنجوێن و بەشێکی قەزای چەمچەماڵ لە پارێزگای سلێمانی تاوەکو ئەمڕۆ کارەبایان نەکراوەتە 24 کاژێری؛ هەروەها سنووری قەزای شەقڵاوە وەک تاکە ناوچەی پارێزگای هەولێر و قەزای ئامێدی لە دهۆک کارەبایان نەکراوەتە 24 کاژێری و هەموویان کاریان تێ دەکرێ.
رۆژی یەکشەممە، 31ـی ئایاری 2026، تیمی پڕۆژەی (رووناکی) بە تۆڕی میدیایی رووداوی گوت: "نزیکەی 90%ـی کۆی هاوبەشانی کارەبا لە هەرێمی کوردستان کارەبایان کراوەتە 24 کاژێری؛ پلان هەیە لەم هاوینەدا ئەو ناوچانەشی ماون کارەبایان ببێتە 24 کاژێری".
بەگوێرەی پڕۆژەی (رووناکی)، دوایین پسووڵەی کارەبا لە پڕۆژەکە بۆ مانگی ئادار بووە بۆ 37 رۆژ و تێکڕا لە پارێزگای هەولێر 61 هەزار دینار پارە گەڕاوەتەوە؛ هەروەها لە سلێمانی 50 هەزار دینار؛ دهۆک 73 هەزار دینار و تێکڕای پارەدانی 37 رۆژەکە لە هەڵەبجە 49 هەزار دینار بووە.
پڕۆژەی رووناکی دەڵێ: "بەپێی نرخە نوێیەکە 80%ی هاووڵاتیان، بەتایبەتی کەمدەرامەتان، پارەیەکی کەمتر دەدەن لە جاران، بەراورد بەو پارەیەی پێشتر دەیاندا بۆ کارەبای موەلیدە و کارەبای نیشتمانی".
پڕۆژەی رووناکی مانگی 11ـی ساڵی 2024 لەلایەن مەسرور بارزانی، سەرۆکی حکومەتی هەرێمی کوردستانەوە راگەیێندرا.