هەرێم کەمال ئاغا: پۆستی سەرۆککۆمار بەرکەوتەی یەکێتییە و بەبێ ئێمە پڕناکرێتەوە

ئەمڕۆ 6ی کانوونی دووەمی 2026، هەرێم کەمال ئاغا، سەرۆکی فراکسیۆنی یەکێتیی نیشتمانیی کوردستان لە پەرلەمانی عێراق، میوانی بووڵتەنی کاژێر 12ی تۆڕی میدیایی رووداو بوو کە سەنگەر عەبدولڕەحمان پێشکێشی دەکات.

هەرێم کەمال ئاغا رایگەیاند، "وادەی پێشکەشکردنی ناوی بەربژێران بۆ پۆستی سەرۆککۆمار کۆتایی هاتووە و پرۆسەکە چووەتە قۆناخێکی هەستیارەوە، تائێستا نە کورد گەیشتووەتە رێککەوتن لەسەر یەک بەربژێر و نە چوارچێوەی هاوئاهەنگیش گەیشتووەتە رێککەوتن لەسەر بەربژێرێکی دیاریکراو بۆ سەرۆکوەزیران."

سەرۆکی فڕاکسیۆنی یەکێتی باسی رێککەوتنی مێژوویی نێوان مام جەلال و سەرۆک بارزانی دەکات و دەڵێت، "بەپێی ئەو رێککەوتنە پۆستی سەرۆککۆماری عێراق بۆ یەکێتی و سەرۆکی هەرێمی کوردستان بۆ پارتی بووە."

رایگەیاند، "یەکێتی خوازارە ئەو نەریتە بەردەوام بێت." دانیش بەوەدا دەنێت کە پرسی سەرۆککۆمار و پێکهێنانی کابینەی نوێی حکومەتی هەرێمی کوردستان بەیەکەوە گرێ دراون و گوتی: "پارتی لە بەرامبەر سەرۆککۆماردا دەیەوێ کابینەی حکومەتی هەرێم پێکبهێنرێت، یەکێتیش لە بەرامبەر کابینەکەدا داوای سەرۆککۆمار دەکات."

هەرێم کەمال ئاغا ئاشکرای کرد کە یەکێتی داوای "هاوسەنگی و شەراکەتێکی راستەقینە" لە حکومەتی هەرێمدا دەکات، کە کاری هاوبەش لە دۆسیەی ئەمنی، ئابووری و دیپلۆماسیدا لەخۆبگرێت. 

لە بەرامبەریشدا، ئامادەییان دەربڕیوە و گوتی: "یەکێتی پێشتر نەرمی نواندووە، تەنانەت لەسەر ئەوەی کە پارتی براوەی یەکەم بوو لە هەڵبژاردن و پۆستی یەکەمی بەرکەوت، یەکێتیش وەک براوەی دووەم دەبوو پۆستی دووەمی پێبدرایە، بەڵام لەسەر داوای جەنابی کاک مەسعود لەوەش کشاینەوە."

سەرۆکی فراکسیۆنی یەکێتی دەشڵێت، "هەرچەندە لایەنە عێراقییەکان لە بەغدا پێیان باشە کورد بە یەک بەربژێرەوە بچێتە دانیشتنی پەرلەمان، بەڵام لە کۆتاییدا ئەو پۆستە بە یەکێتی دەدرێت، ئەگەر رێک نەکەوین، ئاراستەکە لە بەغدا ئەوەیە کە پۆستەکە بە یەکێتیی نیشتمانیی کوردستان بدرێت."

سەبارەت بە بوونی چەندین بەربژێری دیکە لەنێو ریزەکانی یەکێتییەوە وەک مەلا بەختیار، لەتیف رەشید و ئاسۆ فەرەیدوون، سەرۆکی فراکسیۆنی یەکێتی رایگەیاند، "بەربژێری رەسمیی یەکێتی یەک کەسە و بڕیاری مەکتەبی سیاسی لەلایەن فراکسیۆنەکەیانەوە وەک خۆی جێبەجێ دەکرێت و تەنانەت یەک دەنگیش بۆ هیچ بەربژێرێکی دیکە ناڕوات. کێشەی ئێمە تەنیا پۆست نییە، بەڵکو کێشەی خاک، نەوت، بودجەی پێشمەرگە و مافە دەستوورییەکانی دیکەشمان هەیە. دەتوانین هەموو ئەمانە بکەینە یەک پاکێج و لە حکومەتی داهاتوودا جێگیریان بکەین، بەڵام بە رێکنەکەوتن زەرەر دەکەین."