رووداو دیجیتاڵ
بەهۆی شەپۆلێکی بارانبارینی بەخوڕ و مەترسیی دروستبوونی لافاو لە قامشلۆ لە رۆژئاوای کوردستان، ئیدارەی ناوچەکە داوا لە خەڵک دەکات هاوکاری تیمەکان بن، هاوکات ئامادەکاری بۆ رووبەڕووبوونەوەی دۆخی نائاسایی کراوە.
ئیدارەی خۆجێی قامشلۆ لە ئاگادارییەکی بڵاوکردووەتەوە و دەڵێت: ناوچەکەیان رووبەڕووی بارانی بەخوڕ و لافاو بووەتەوە، ئەمەش پێویستی بە یەکخستنی هەوڵەکان و بەدەمەوەچوونی خێرا هەیە بۆ کەمکردنەوەی زیانەکان و پاراستنی گیان و ماڵی هاووڵاتییان.
بەپێی راگەیێندراوەکە، بۆ رووبەڕووبوونەوەی ئەم دۆخە، ئەنجوومەنی شاری قامشلۆ بە هاوئاهەنگی لەگەڵ هێزەکانی ئاسایشی ناوخۆ و لیوای قامشلۆ کاردەکەن بۆ ئامادەکردنی تیمەکان و ئامێر و کەلوپەلی پێویست تاوەکو بە هانای هاووڵاتییانەوە بچن و پێداویستییە بەپەلەکانی ناوچەکە دابین بکەن.
ئیدارەی شارەکە، لە روانگەی "بەرپرسیارێتیی کۆمەڵایەتی و گیانی هاوکارییەوە" داوا لە خاوەن ئامێر و کەلوپەلەکان و هەر کەسێک کە توانای پێشکێشکردنی هاوکاری و خزمەتگوزاریی هەیە دەکات، پەیوەندییان پێوە بکەن و دەستپێشخەری بنوێنن بۆ پشتیوانیکردنی هەوڵەکان لە رووبەڕووبوونەوەی لافاوەکە و هاوکاریکردنی زیانلێکەوتووان.
