تەحین خۆشترە یان نۆتێلا؟ وەڵامەکەی لە فێستیڤاڵی تەحینەوە

تۆڕی میدیایی رووداو رووماڵی فێستیڤاڵەکە دەکات، بۆچوونی هاونیشتیمانییان وەرگرتووە، "تامی ئەو بەرهەمە خۆماڵییە [تەحین]خۆشترە یان شیرینییە دەستکردەکان وەکۆ نۆتێلا و نەستەلە."

خۆشی ئامێدی، دانیشتوویەکی سنوورەکەیە بە پەیامنێری رووداوی گوت: "تەحین لە کونجی خۆماڵی دروست دەکرێت، وەکو شیرینییەکانی دیکە نییە، کە هەمووی شەکرە و زەیتی زۆری تێدایە، تەحین وانییە ئەو زەیتەی تێدایە هەر هی خۆیەتی و سرووشتییە."

حاجی سەلام، پیاوێکی بە تەمەنی قەزای ئامێدی قسەی بۆ رووداو کرد و گوتی: "تەحین هێزە بۆ مرۆڤ، وەکو نەستەلە و شیرینییەکانی دیکە نییە، تەحین بخۆی لە نەخۆشی بەدوور دەبی."

نەرمین موحسین، هاونیشتمانییەکی دیکەیە باس لەوە دەکات "تەحین بۆ سەر گەدەی مرۆڤ باشترە لە شیرینییە دەستکردەکان."

ڤەژین عەبدولڕەحمان، پەرلەمانتاری کوردستان دەڵێت، "تەحین بەردەوام لەسەر سفرەکانمان ئامادەیە و پشتگیری بەرهەمە خۆماڵییەکان دەکەین".

ئەرین فوئاد، خانمێکی هەولێرە و چووەتە فێستیڤاڵەکە و بۆچوونی جیاوازە، دەڵێ: "تەحین و نۆتێلا دوو شتی جیاوازن، تەحین تامێکی خۆش و تایبەتی هەیە، بە تایبەتی تەحینی ئامێدی، بەڵام نۆتێلاش تامی خۆی هەیە، ئەویش هەر خۆشە".

لە قەزای ئامێدی زیاتر لە 50 ئاشی تەحین هەن، بەشێکی بەرهەمەکەی دەنێردرێنە بازارەکانی ئەورووپا و ئەمریکا.