بنکەی منداڵبوونی رۆڤیا حەوت ساڵە تەواو بووە و یەک منداڵی تێدا لەدایک نەبووە

بنکەکە لە ساڵی 2017ـەوە کارەکانی تەواو بووە، بەڵام تاوەکو ئێستا تەنانەت یەک منداڵیش لێرە لەدایک نەبووە، هۆکارەکەیشی نەبوونی ستافە.

تەنیا هەندێک کاری سەرەتایی وەکو کوتان (پێدانی ڤاکسین) و تۆمارکردن لەو بنکەیەدا ئەنجام دەدرێن.

بەڕێوەبەری بنکەکە ئاماژە بەوە دەکات کە ئەوان بۆ کارپێکردنی بنکەکە، پێویستیان بە ستافێکی 20 بۆ 30 کەسی و تاقیگە هەیە.

سامی خدر، بەڕێوەبەری بنکەی منداڵبوون لە رۆڤیا دەڵێت، "بنکەکە هێشتا نەکراوەتەوە لەبەر چەند هۆکارێک، کە دیارترینیان نەبوونی ستافە. دەبێت پزیشکی ئافرەتان، کارگوزار، کەلوپەل و تاقیگە هەبێت، ئەوانەش تاوەکو ئێستا بۆ ئەم بنکەیە دابین نەکراون. بەڕێوەبەری ناحیە داواکارییەکەمانی گەیاندووەتە بەڕێوەبەرایەتیی تەندروستیی بەردەڕەش و ئەوانیش ئاگادارن. بەڕاستی ئەوانیش هەوڵیان داوە، بەڵام نازانم بۆچی سەرەڕای ئەوانەش، ئیشەکە ناکرێتەوە."

کاتێک بەناو بنکەکەدا دەگەڕێییت، هۆڵەکانی چۆڵ و بەتاڵن. لەجیاتی ئەوەی خزمەتی زیاتر لە 30 هەزار کەسی دانیشتووی ناحیەی رۆڤیا بکات.

نەسرین محەممەد ئەمین، پەرستار (تیمارکار) لەوبارەیەوە دەڵێت: "من خۆم پەرستارم، قەت کاری منداڵبوونم نەکردووە، بەڵام پزیشکەکەمان گوتی لەگەڵی بڕۆ و بە ئەمبوڵانس بڕۆن بۆ ئاکرێ. منیش گوتم باشە. لەگەڵی چووم، هێشتا نەگەیشتبووینە سەر پردەکە حاڵی خراپ بوو (خەریک بوو منداڵی دەبوو) و هیچ کەرەستەیەکمان پێنەبوو ناوکەکەی ببڕین. جا ئەو دوو ژنەی لەگەڵیدا بوون زۆر ترسان. سێ چوار حاڵەتی لەو شێوەیەمان بۆ هاتووە، کە ژنەکە لەڕێگەدا منداڵی بووە. ئەگەر لێرە بەشی منداڵبوون هەبووایە، ئەو فەقیرانە وایان لێ نەدەهات."

48 گوند سەر بە ناحیەی رۆڤیان. هەر ژنێک کە کاتی منداڵبوونی دێت، یان دەبێت رەوانەی نەخۆشخانەکانی ئاکرێ یان بەردەڕەش بکرێت، یان دەبێت مامانێک (داپیرەیەک) لە ماڵەوە منداڵەکەی بۆ ببێت.