رووداو دیجیتاڵ
ئۆتۆمبێلێک لە پارێزگای مەڕەشی باکووری کوردستان خۆی بە 5 کەسدا کێشا، کە هەوڵیان دەدا بۆ ئەوبەری شەقامێک بپەڕنەوە، لە ئەنجامدا دوویان گیانیان لەدەستدا و سێ کەسی دیکەش بریندار بوون.
رووداوەکە ئەمڕۆ سێشەممە 26ی ئابی 2025 لە شارۆچکەی گۆکسون سەر بە پارێزگای مەڕەش روویدا. دوای ئەوەی شۆفێرەکە کۆنترۆڵی ئۆتۆمبێلەکەی لەدەستدا، خۆی بە 5 پیادەڕۆکەدا کێشا.
تیمەکانی تەندروستی، بەرگریی شارستانی و پۆلیس چوونە شوێنی رووداوەکە. دوو لە پیادەڕۆکان گیانیان لەدەستدا و سێشیان بریندار بوون.
بریندارەکان گەیێندرانە نەخۆشخانە و تەرمی دوو کەسەکەش رەوانەی دادپزیشکیی کران.
لە شەش مانگی سەرەتای ئەم ساڵدا 313 هەزار و 868 رووداوی هاتووچۆ لە باکووری کوردستان و تورکیا روویانداوە، لە ئەنجامدا هەزار و 125 کەس گیانیان لەدەستداوە و 185 هەزاری دیکەش بریندار بوون.
