رووداو دیجیتاڵ
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی هەرێمی کوردستان دەڵێ: "دوای ئەوەی نرخی دۆلار بە بڕیاری حکومەتی عێراق بەرزبووەوە، 15%ـی کەلوپەل و پێداویستییەکان لە بازاڕ گران بوون، بەڵام دوای ئەوەی نرخەکە جێگیر بوو، لە دوێنێوە نرخی مادە خۆراکییەکان دابەزیوە، بە تایبەت برنج، شەکر، چا و بەرهەمە دانەوێڵەییەکان".
بەڕێوەبەری گشتیی بازرگانی، ئەمڕۆ یەکشەممە بە رووداوی راگەیاند: "بەردەوامیی دابەشکردنی بەشەخۆراکی مانگانە هۆکارێکی دیکەیە کە وایکردووە نرخی پێداویستییەکان دابەزێ. پێشبینیش دەکەین لە رۆژانی داهاتوودا نرخ زیاتر دابەزێ".
زیاتر لە هەفتەیەکە دابەشکردنی هەشتەمین بەشەخۆراکی مانگانە لە هەرێمی کوردستان دەستی پێکردووە.
لەبارەی چاودێریکردنی بازاڕ و رێگری لە بەرزبوونەوەی نرخ، نەوزاد شێخ کامیل گوتی: "دوای دابەزاندنی بەهای دینار، تیمەکانمان زیاتر لە هەزار سەردانیان بۆ نێو بازاڕ ئەنجامداوە و بەهۆی گرانکردنی نرخی کاڵاکانیشەوە نزیکەی 100 شوێن لە سەرانسەری هەرێمی کوردستان سزای مادی دراون یان بڕیاری داخستنیان بۆ دەرکراوە".
ئەم رێکارانەی وەزارەتی بازرگانی لە کاتێکدان، ئەنجوومەنی وەزیرانی عێراق رۆژی 6ـی تشرینی یەکەمی 2026 بڕیاری دا بە گۆڕینی نرخی فەرمیی ئاڵوگۆڕی دینار بەرامبەر دۆلاری ئەمریکی، کە بەگوێرەی بڕیارەکە نرخی فرۆشتنی هەر دۆلارێک بۆ هاووڵاتییان بە هەزار و 520 دینار دیاریکرا و چووە واری جێبەجێکردنەوە.




