رووداو دیجیتاڵ
پەیامنێری رووداو رایگەیاند، کۆبوونەوەکەی پارتی دیموکراتی کوردستان و یەکێتیی نیشتمانیی کوردستان لە هەولێر کۆتایی هات و هەردوولا گلەییەکانیان بەیەکدی گەیاندووە.
رۆژی شەممە، 21ـی تشرینی دووەمی 2026، دڵنیا رەحمان، پەیامنێری رووداو، لە شوێنی کۆبوونەوەکەدا گوتی: "کاژێر 11:00 کۆبوونەوەی مەکتەبی سیاسیی پارتی دیموکراتی کوردستان و یەکێتیی نیشتمانیی کوردستان لە هەولێر دەستیپێکرد و کاژێر و نیوێکی خایاندووە."
دڵنیا رەحمان ئاماژەی بەوەشکرد: "لە شاندی پارتیدا، هەریەکە لە د. پشتیوان سادق، ئەندامی مەکتەبی سیاسیی پارتی و مەحموود محەممەد، گوتەبێژی پارتی، بەشدارییان لە کۆبوونەوەکەدا کردووە؛ لە شاندی یەکێتیشدا هەریەکە لە د. رێواس فایەق و د. یوسف گۆران، ئەندامانی مەکتەبی سیاسیی یەکێتی، بەشدارییان کردووە."
لەبارەی نێوەڕۆکی کۆبوونەوەکە کە لە بارەگای مەکتەبی سیاسیی یەکێتیی نیشتمانیی کوردستان بەڕێوەچووە، پەیامنێری رووداو گوتی: "بەگوێرەی زانیارییە سەرەتاییەکان لە کۆبوونەوەکەدا پارتی و یەکێتی گلەییەکانیان بەیەکدی گەیاندووە و گفتوگۆیان لەسەر کردووە."
بەگوتەی پەیامنێری رووداو، "هەردوو شاندی یەکێتی و پارتی نێوەڕۆکی کۆبوونەوەکەی ئەمڕۆ دەبەنەوە سەرکردایەتیی حیزب و دوای گفتوگۆکردن لەسەری، بڕیارە کۆبوونەوەی دیکەی بەدوادا بێت."


