رووداو دیجیتاڵ
ئەندامێکی سەرکردایەتیی یەکێتیی نیشتمانیی کوردستان دەڵێ، ئەمڕۆ پارتی و یەکێتی لەسەر ئاستی مەکتەبی سیاسی کۆدەبنەوە.
دارا رەشید، ئەندامی سەرکردایەتیی یەکێتیی نیشتمانیی کوردستان بە پێشەوا بەختیار، پەیامنێری رووداوی لە سلێمانی راگەیاند، "کۆبوونەوەکە لە هەولێر دەبێت و لە لایەنی یەکێتیی نیشتمانیی کوردستان هەریەکە لە د. یوسف گۆران و د. رێواس فایەق، لە لایەنی پارتی دیموکراتی کوردستانیشەوە هەریەکە لە د. پشتیوان سادق و کاک مەحموود محەممەد بەشدار دەبن."
ئەو ئەندامەی سەرکردایەتیی یەکێتی ئاماژەی بەوەش کرد، "ئەنجامدانی کۆبوونەوەکە سەرەتایەکە و ئینشائەڵڵا بەو ئاراستەیە دەڕوات کە لە بەرژەوەندیی کۆمەڵانی خەڵکی کوردستان بێت."
لە وەڵامی پرسیارێکی دیکەی پەیامنێری رووداودا کە "ئایا یەکێتی بەنیازە سلێمانی لە هەرێمی کوردستان جیابکاتەوە؟" د. دارا رەشید کە هاوکات وەزیری پلاندانانی هەرێمی کوردستانە، بە رووداوی گوت، "نەخێر، یەکێتی خۆی بە خاوەنی هەموو کوردستان دەزانێت. ئەمڕۆ یادی رۆژی شەهیدانی یەکێتیی نیشتمانیی کوردستانە. بستێک لەم کوردستانە نییە، لە هەر چوار پارچەی کوردستانیش کە یەکێتی نیشتمانیی کوردستان تێیدا خوێنی نەڕشتبێت و شەهیدی نەدابێت. یەکێتیی نیشتمانیی کوردستان خۆی بە خاوەنی هەموو کوردستان دەزانێ، بەڵام ئەوەی ئێمە دەمانەوێ حوکمڕانییەکی رەشید و راستە کە خزمەتکاری هەموو خەڵکی کوردستان بێت."


