پرۆژەیەکی پێنج ملیار دیناری بەهۆی لافاوەوە لە خورماتوو تێکچوو؛ داوای لێکۆڵینەوە دەکرێ

رووداو دیجیتاڵ

بەهۆی بارانبارین و لافاوەوە، بەشێکی زۆری رێگەی بازنەیی خورماتوو رووخا. ئەندامێکی ئەنجوومەنی پارێزگای سەلاحەدین دەڵێت: "پڕۆژەکە نزیکەی پێنج ملیار دیناری تێچوو بوو و تەمەنی تەنیا چەند رۆژێک بوو، بۆیە دەبێت لێکۆڵینەوە لەگەڵ کۆمپانیای جێبەجێکار بکرێ."

یاسین داودی، ئەندامی ئەنجوومەنی پارێزگای سەلاحەدین، رۆژی شەممە، 7ـی تشرینی دووەمی2026، بە رووداوی راگەیاند: "رێگەی بازنەیی خورماتوو، کە تێچووەکەی چوار ملیار و 800 ملیۆن دینار بوو و درێژییەکەی 7 کیلۆمەترە، لە 28ی تشرینی یەکەمی ئەم ساڵ کرایەوە، بەڵام لە یەکەم شەپۆلی لافاودا رووخا."

ئەندامەکەی ئەنجوومەنی پارێزگای سەلاحەدین گوتیشی: "چەندین جار هۆشداریمان دابوو کە ناوچەکە پێویستی بە پردێکی بەرزە نەوەک رێڕۆیەکی نزم و جێبەجێکردنی ئەو پلانەش پێویستی بە نزیکەی 20 ملیار دینار بوو و رامانگەیاند کە دەبێ پارێزگار لەگەڵ سەرۆکوەزیرانی عێراق قسە بکات بۆ ئەوەی ئەو پارەیەی بۆ تەرخان بکرێ."

ئەو ئەندامەی ئەنجوومەنی پارێزگا داوای کرد کە لیژنەیەکی تەکنیکی و کارگێڕی پێکبهێندرێ بۆ لێکۆڵینەوە لە کواڵیتی پڕۆژەکە و دیاریکردنی کەمتەرخەمیی کۆمپانیای جێبەجێکار و لایەنی چاودێر.

دوای تێکچوونی رێگەکە، هەیسەم زەهوان، پارێزگاری سەلاحەدین، لەگەڵ فەرماندەی پۆلیسی پارێزگاکە سەردانی خورماتووی کرد.