رووداو دیجیتاڵ
پەرلەمانتارێکی کورد لە بەغدا دەڵێت، لەو 100 ملیۆن بەرمیل نەوتەی حکومەتی عێراق بڕیاریداوە بۆ هەرێمی کوردستانی بنێرێ، هەفتەی داهاتوو لە قۆناخی یەکەمدا 50 ملیۆن لیتر نەوتی سپی دەنێردرێ. وەزیری نەوتی عێراقیش دەڵێ: سەرۆکوەزیران فەرمانی ناردنی نەوتەکەی دەرکردووە.
رۆژی یەکشەممە، 01ی تشرینی دووەمی 2026، سروە محەممەد، ئەندامی فراکسیۆنی یەکێتی لە پەرلەمانی عێراق بە رووداوی راگەیاند: "حکومەتی عێراق لەو 100 ملیۆن لیتر نەوتەی بڕیارە بۆ هەرێمی کوردستانی بنێرێ، ناوەڕاستی هەفتەی داهاتوو قۆناخی یەکەمی دەستپێدەکات و نیوەی دەنێرێ."
سروە محەممەد دەڵێ، "ئەمڕۆ یەکشەممە، لەگەڵ بەڕێوەبەری گشتیی بەرهەمە نەوتییەکان عێراق (د. حسێن خرسان) قسەم کردووە و رایگەیاندووە، هەفتەی داهاتوو قۆناخی یەکەمی ناردنی نەوتی سپی بۆ هەرێمی کوردستان دەستپێدەکات و بەسەر ناوچە شاخاوییەکان دا دابەش دەکرێت."
ئەو پەرلەمانتارە گوتی، "جگە لەو 100 ملیۆن لیترە، رۆژی چوارشەممە 28ی تشرینی یەکەم، وەک فراکسیۆنی یەکێتی لە بەغدا بە نووسراوی فەرمی داوامان لە وەزیری نەوت کردووە 240 ملیۆن لیتر نەوت بۆ سەرجەم شارەکانی هەرێمی کوردستان دابین بکات."
وەزارەتی نەوتی عێراق لە راگەیێندراوێکدا ئاماژەی بەوەکرد، بە فەرمانی عەلی زەیدی، سەرۆکوەزیرانی عێراق، باسم محەممەد عەبادی، وەزیری نەوت، کۆمپانیای دابەشکردنی بەرهەمە نەوتییەکانی راسپاردووە کە بە زووترین کات رێکارە پێویستەکان بگرنە بەر بۆ ئامادەکردنی پشکەکان.
بەپێی راگەیێندراوێکی نووسینگەی راگەیاندنی وەزارەتی نەوت، ئەم بڕیارە لە چوارچێوەی هەوڵەکانی حکومەتی فیدراڵدایە بۆ سووککردنی گوشاری دارایی لەسەر هاووڵاتییان لە وەرزی سەرما و بەفردا.
هەفتەیەکە دابەشکردنی نەوت لە شارەکانی عێراق دەستیپێکردووە و 200 لیتر نەوت بە 30 هەزار دینار دەدرێتە هاووڵاتییان.
بەگوێرەی داتاکانی وەزارەتی سامانە سروشتییەکان، هەرێمی کوردستان بۆ ئەوەی یەک بەرمیل نەوت بەسەر سەرجەم خێزانەکاناندا دابەش بکات پێویستی بە 240 ملیۆن لیتر نەوتە.
سەرباز کەریم، گوتەبێژی گۆڕەپانی سووتەمەنیفرۆشانی هەولێر بە رووداوی گوت: "بەهۆی نزیکبوونەوەی وەرزی سەرما، نرخی بەرمیلێک نەوتی بازرگانی لە بازاڕەکانی هەرێمی کوردستان گەیشتووەتە 330 هەزار دینار."
سەلام عومەر، گوتەبێژی نەوت و کانزاکانی سلێمانی بە رووداوی گوت: "هەموو ئامادەکارییەکمان بۆ دابەشکردنی نەوت کردووە، بەڵام تاوەکو ئێستا وەزارەتی سامانە سروشتییەکانی هەرێمی کوردستان لە رەوانەکردنی نەوتی سپی ئاگاداری نەکردووینەتەوە."
