رووداو دیجیتاڵ
کۆمپانیای فلای ئەربیل دەڵێ، لە سەرەتای مانگی داهاتووەوە گەشتی ئاسمانی لەنێوان هەولێر – بەغدا دەستپێدەکات. بەڕێوەبەری کۆمپانیاکە دەڵێت، تیکت لە 99 هەزار دینارەوە دەستپێدەکات.
فلای ئەربیل لە راگەیێندراوێکدا دەڵێت: "لە یەکشەممە 01-11-2026ـەوە رووگەیەکی نوێی گەشتیاری لەنێوان (هەولێر – بەغدا – هەولێر) دەخەینە خزمەت گەشتیاران، بە ئەنجامدانی گەشتی چوون و هاتن".
لاوەند مەمووندی، بەڕێوەبەری جێبەجێکاری کۆمپانیای فلای ئەربیل، ئەمڕۆ هەینی بە تۆڕی میدیایی رووداوی گوت: "لەمەودوا رۆژانە سێ گەشتی چوون و هاتنمان بۆ بەغدا دەبێت".
مەمووندی ئاماژەی بەوە کرد، نرخی تیکت لە 99 هەزار دینارەوە دەستپێدەکات.
فلای ئەربیل رۆژی 22-10-2026 وەرگرتنی بڕوانامەی (AOC) هێڵی ئاسمانیی بە فەرمی راگەیاند و ئاماژەی بەوەکرد، لەمەودوا وەک هێڵێکی عێراقیی باوەڕپێکراو کارەکانی فراوانتر دەکات.
لە راگەیێندراوی کۆمپانیاکەدا هاتووە: "ئەم هەنگاوە لە چوارچێوەی فراوانکردنی تۆڕی گەشتەکانی کۆمپانیا و دابینکردنی هەڵبژاردەی زیاتر و ئاسانتر بۆ گەشتیارانمانە".
جگە لە گەشت بۆ بەغدا، فلای ئەربیل تاکە هێڵی فڕۆکەوانییە کە ئێستا لە هەرێمی کوردستانەوە رۆژانە گەشتی راستەوخۆی بۆ بەشێک لە وڵاتانی ئەورووپا هەیە.
