رووداو دیجیتاڵ
وەزارەتی کۆچ و کۆچبەرانی عێراق رایگەیاند، داواکارییان بۆ دابینکردنی بەرمیلێک نەوت بۆ هەر خێزانێکی ئاوارەی کەمپەکانی هەرێمی کوردستان بەرزکردووەتەوە و چاوەڕێی وەڵامن.
هەینی 30ی تشرینی یەکەمی 2026، عەلی جەهانگیر، گوتەبێژی وەزارەتی کۆچ و کۆچبەرانی عێراق بە تۆڕی میدیایی رووداوی راگەیاند: "لە رێگەی ئەنجوومەنی وەزیرانی عێراقەوە داوای 200 لیتر نەوتیان کردووە بۆ هەر خێزانێکی ئاوارەی کەمپەکانی هەرێمی کوردستان و چاوەڕێی وەڵامی وەزارەتی نەوتن لەبارەی میکانیزمی دابینکردنەکەوە تاوەکو بگوێزرێتەوە بۆ ئەو خێزانانە".
زیاتر لە 16 هەزار خێزانی ئاوارە لە کەمپەکانی هەرێمی کوردستان لە هەولێر و دهۆک ماون کە نەگەڕاونەتەوە زێدی خۆیان.
عەلی جەهانگیر راگەیاند، لە دوای دابینکردنی نەوتەکە لەلایەن وەزارەتی نەوتەوە بە دوو کاروان بۆ ئەو خێزانانە دەدرێت کە هەر جارە و 100 لیتر دەبێت.
ئەو داواکارییەی وەزارەتی کۆچ و کۆچبەرانی عێراق بۆ ناردنی نەوت بۆ کۆچبەران هاوکاتە لەگەڵ وەرزی سەرما و دابەزینی پلەی گەرما.
