رووداو دیجیتاڵ
بەڕێوەبەری گشتیی گومرگی ئیلام دەڵێ، لە شەش مانگدا بایی 453 ملیۆن دۆلار کاڵا لە رێگەی دەروازەی سنووریی مێرانەوە هەناردە کراوە. ئاماژە بەوەش دەکات، بەراورد بە هەمان کاتی پار، کەمی کردووە.
ئەمڕۆ هەینی 25-09-2026، سۆهراب کەمەری، بەڕێوەبەری گشتیی گومرگی پارێزگای ئیلامی رۆژهەڵاتی کوردستان رایگەیاند، لە سەرەتای ئەم ساڵی هەتاوییەوە (21-03-2026) تاوەکو 21ـی ئەیلوول، قەبارەی هەناردەی کاڵا لە دەروازەی سنووریی مێرانەوە گەیشتووەتە یەک ملیۆن و 46 هەزار و 579 تۆن.
بەگوتەی سۆهراب کەمەری، کاڵا هەناردەکراوەکان بایی 453 ملیۆن دۆلار بوون کە بریتی بوون لە: ''ئامێری کشتوکاڵی، شووشە، شیش، ئاسن، ماسی، بەرهەمە پلاستییکییەکان، بەرد و کاشی''.
بەڕێوەبەری گشتیی گومرگی ئیلام ئاماژەی بەوەش کرد، بەراورد بە هەمان کاتی پار، هەناردەی کاڵا لە دەروازە سنوورییەکەوە کەمی کردووە، ''پار بەگشتی دوو ملیۆن و 384 هەزار و 896 تۆن کاڵا هەناردە کرا کە بایی یەک ملیار و 318 ملیۆن دۆلار بوون.
دەروازەی سنووریی مێران بە دووری 85 کیلۆمەتر کەوتووەتە باشووری رۆژئاوای شاری ئیلام و لە دیوی عێراقەوە دەکەوێتە سنووری پارێزگای واست و ناوی (زڕباتیە)یە.
دەروازەکە یەکێک لە دەروازە سەرەکییەکانی نێوان ئێران و عێراقە بۆ ئاڵوگۆڕی بازرگانی، هەروەها بەهۆی نزیکی لە شوێنە پیرۆزەکانی شیعە لە عێراق، زۆرترین زیارەتکار هاتووچۆی پێدا دەکەن.
.avif&w=3840&q=75)