رووداو دیجیتاڵ
سەرۆکی هەرێمی کوردستان پێشوازی لە سەرۆکی دەستەی دەستپاکیی عێراق کرد و رایگەیاند، هەرێمی کوردستان ئامادەی هەموو هاوکاری و هەماهەنگییەکە لەگەڵ دەستەکە بۆ پاراستنی یاسا و سەربەخۆییی دەسەڵاتی دادوەری.
رۆژی چوارشەممە، 26ـی ئابی 2026، نێچیرڤان بارزانی، سەرۆکی هەرێمی کوردستان، پێشوازی لە محەممەد عەلی مفتن، سەرۆکی دەستەی دەستپاکیی عێراق (فیدراڵ) و شاندێکی یاوەری کرد.
بەپێی راگەیێندراوێکی سەرۆکایەتیی هەرێمی کوردستان، لە دیدارەکەدا کە ئەحمەد ئەنوەر، سەرۆکی دەستەی دەستپاکیی هەرێمی کوردستان ئامادەی بوو، "بەهێزکردنی هاوکاری و هەماهەنگیی نێوان دەستەی دەستپاکیی فیدراڵی و لایەنە پەیوەندیدارەکانی هەرێمی کوردستان تاوتوێکرا و هەردوولا جەختیان لەسەر گرنگیی سەربەخۆییی دامەزراوەکانی دەستپاکی و رۆڵیان لە چەسپاندنی سەروەریی یاسادا کردەوە."
بەگوێرەی راگەیێندراوەکە نێچیرڤان بارزانی جەختیکردەوە کە هەرێمی کوردستان ئامادەی هەموو هاوکاری و هەماهەنگییەکە لەگەڵ دەستەی دەستپاکیی فیدراڵی و هەموو لایەنەکانی دادوەری، ئەوەش "لەپێناو پاراستنی یاسا و سەربەخۆییی دامەزراوەکان و دەسەڵاتی دادوەریدا."
لە راگەیێندراوەکەدا هاتووە، محەممەد عەلی مفتن، سوپاس و پێزانینی خۆی ئاراستەی لایەنە پەیوەندیدارەکانی هەرێمی کوردستان کردووە بۆ ئەو هاوکارییە بەردەوام و بەرهەمدارەی لەگەڵ دەستەکەیان و لایەنە پەیوەندیدارە فیدراڵییەکاندا هەیانە.
