رووداو دیجیتاڵ
نرخی خانووبەرە لە ئامەد، بەراورد بە پارێزگاکانی دیکەی تورکیا و باکووری کوردستان بە شێوەیەکی بەرچاو بەرزبووەتەوە، بە جۆرێک نرخی مەترێک دووجا تێکڕا لەنێوان 520-930 دۆلارە.
بەگوێرەی ئاماری پلاتفۆرمەکانی خانووبەرە، تێکڕای نرخی خانوو لەسەر ئاستی تورکیا و باکووری کوردستان بۆ 5.2 ملیۆن لیرەی تورکی (نزیکەی 150,700 دۆلار) بەرزبووەتەوە.
لەم چوارچێوەیەدا بازاڕی خانووبەرەی ئامەد جیاوازیی گەورەی لە نرخدا تۆمار کردووە و نرخی خانووبەرە لە ئامەد بە شێوەیەکی بەرچاو بەرزبووەتەوە، بە جۆرێ لەسەر بنەمای مەتری چوارگۆشە، نرخەکە لە نێوان 25 هەزار لیرە (نزیکەی 520 دۆلار) بۆ 45 هەزار لیرە (نزیکەی 930 دۆلار) دەگۆڕێ.
لە ئامەد کایاپنار گرانترینە
لە ئامەدی باکووری کوردستان، جیاوازییەکی بەرچاو لە نێوان ناوچەکان هەیە و ناوچەی کایاپنار لە پلەی یەکەمی گرانترینەکاندایە.
تێکڕای نرخی فرۆشتنی شوقەیەکی ئاسایی لە کایاپنار لەنێوان 3.5 ملیۆن لیرە (نزیکەی 72000 دۆلار) بۆ 4.5 ملیۆن لیرە (نزیکەی 93000 دۆلار)ە، بەڵام نرخەکە بەگوێرەی تەمەنی باڵەخانە، رووبەر و شوێنەکەی دەگۆڕێ.
شوقە ستانداردەکانی جۆری 2+1 (دوو ژووری) لە ئامەد بە 2.5 ملیۆن لیرە (نزیکەی 103,000 دۆلار) بۆ 4.5 ملیۆن لیرە (نزیکەی 93000 دۆلار) پێشان دەدرێن. بۆ ئەوانەش کە دەیانەوێ شوقەی گەورەتری وەک 3+1 (سێ ژوور و هۆڵێک) یان 4+1 (چوار ژوور و هۆڵێک) بکڕن، نرخەکان لە 3.5 ملیۆن لیرەوە (نزیکەی 72000 دۆلار) دەستپێدەکەن و تاوەکو هەشت ملیۆن لیرە (نزیکەی 166000 دۆلار) بۆ 10 ملیۆن لیرە (نزیکەی 207000 دۆلار) دەڕۆن.
لە ناوچە گرانبەهاکانی کایاپناریش، وەک دجلەکێنت، شەقامی 75 مەتری، فورات و تالایتەپە، نرخی شوقە نوێیەکانی نێو کۆمەڵگە نیشتەجێبووەکان، لەنێوان 5 ملیۆن لیرە (نزیکەی 104,000 دۆلار) بۆ 10.5 ملیۆن لیرە (نزیکەی 218000دۆلار) دایە. لە هەندێک پڕۆژەی کواڵیتی بەرزیشدا، نرخی شوقە دەگاتە 25 ملیۆن لیرە (نزیکەی 520000 دۆلار).
باغلار و یەنیشەهیر، شوێنی هەرزانتر بەراورد بە کایاپنار، قەزاکانی باغڵار و یەنیشەهیر بەهۆی زۆریی باڵەخانە کۆنەکان و پڕۆژەکانی نیشتەجێبوونی حکومی، نرخەکانیان گونجاوترە. لەو ناوچانەدا نرخی شوقە لە نێوان 1.8 ملیۆن لیرە (نزیکەی 37000 دۆلار) بۆ 3.5 ملیۆن لیرە (نزیکەی 72000 دۆلار) دایە.
