بەغدا و هەولێر بۆ چارەسەرکردنی کێشەکانی کەرتی تەندروستی رێککەوتن

رووداو دیجیتاڵ

وەزیری تەندروستیی عێراق رایگەیاند، لەگەڵ وەزارەتی تەندروستیی هەرێمی کوردستان نەخشەڕێگەیەک بۆ باشترکردنی خزمەتگوزارییە تەندروستییەکان دادەڕێژن. وەزیری تەندروستیی هەرێمی کوردستانیش دەڵێت، هاوئاهەنگییەکان بۆ یەکخستنی رێنماییەکانی دەرمان و شێرپەنجە پتەوتر دەکەن.

ئەمڕۆ یەکشەممە 28ـی حوزەیرانی 2026، عەبدولحوسێن مووسەوی، وەزیری تەندروستیی عێراق سەردانی هەولێری کرد و لەگەڵ سامان بەرزنجی، وەزیری تەندروستیی هەرێمی کوردستان کۆبووەوە. دواتر لە کۆنفرانسێکی رۆژنامەڤانیی هاوبەشدا باسیان لە ناوەڕۆکی کۆبوونەوەکەیان کرد.

عەبدولحوسێن مووسەوی، وەزیری تەندروستیی عێراق رایگەیاند، "لە کەشێکی برایانە و دۆستانە گفتوگۆمان لەبارەی کۆی بەربەستەکانی بەردەم پرسی تەندروستی کرد و بڕیارماندا نەخشەڕێگەیەک دابڕێژین بۆ کارئاسانیی زیاتر و باشترکردنی دۆخی خزمەتی تەندروستی و پتەوکردنی پەیوەندییەکانی هەردوو وەزارەت." 

وەزیری تەندروستیی عێراق ئاماژەی بەوە کرد، باسیان لە بابەتی دەرمان و هاوتاکردنی پرسی بیمەی تەندروستی بۆ پارێزگاکانی هەرێمی کوردستان کردووە، هاوشێوەی پارێزگاکانی دیکەی عێراق. گوتیشی، "سەرەتا لە نەجەف و کەربەلا دەستپێدەکەین و دواتر بەسرە و ناسریە دەگرێتەوە. هەفتەی داهاتووش دوو پارێزگای هەرێمی کوردستان دەگرێتەوە."

مووسەوی جەختی لەوەش کردەوە، باسیان لە کاراکردنەوەی نوێنەرایەتیی هەرێمی کوردستان لە وەزارەتی تەندروستیی حکومەتی فیدراڵی کردووە و "هیچ کێشەیەکمان لەگەڵ وەزارەتی تەندروستیی حکومەتی هەرێمی کوردستان نییە و نابێت."

لە لایەن خۆیەوە، سامان بەرزنجی، وەزیری تەندروستیی هەرێمی کوردستان رایگەیاند، لە کۆبوونەوەکەدا باسیان لە رەوشی تەندروستیی هەرێمی کوردستان لە هەموو بوارەکاندا کردووە و داتا و ئاماری تایبەتیان پێشکێش کردوون.

سامان بەرزنجی گوتی، "چەند تەوەرێکی دیکەی گفتوگۆکانمان بریتی بوون لە لایەنی کارگێڕی، یاسایی، پێداویستیی دەرمان و پزیشکی، بابەتی ئاوارە و پەنابەران، هەروەها هەژمارکردنی پارێزگای هەڵەبجە وەک چوارەمین پارێزگای هەرێمی کوردستان بۆ دابینکردنی سەرجەم پێداویستییە پزیشکی و تەندروستییەکانی." 

وەزیری تەندروستیی هەرێمی کوردستان ئاماژەی بەوەش کرد، باسیان لە شایستە داراییەکانی هەرێمی کوردستان کردووە لە پڕۆژەیاسای بودجەی عێراقدا، کە پێداویستییەکانی دەرمان، ئامێر و کەرەستەی پزیشکی، پڕۆژە نیشتمانییەکان و قەرز و بەخشینە نێودەوڵەتییەکان دەگرێتەوە.

سامان بەرزنجی هەڵوێستی وەزیری تەندروستیی عێراقی بەرز نرخاند و گوتی، "بە سوپاسەوە هەڵوێستی بەڕێز وەزیری تەندروستی بەرز دەنرخێنین بەوەی هیچ جیاوازییەک ناکات لەنێوان هاووڵاتییانی هەرێمی کوردستان و عێراق. بەڵێنی داوە ئەو بڕگانەی پەیوەندیی راستەوخۆیان بە وەزارەتەکەیەوە هەیە جێبەجێیان بکات و ئەوانەی دیکەش بخاتە رۆژەڤی ئەنجوومەنی وەزیرانی عێراق."

هەروەها رایگەیاند، هاوئاهەنگییەکانیان لەبارەی هاوردەکردن و هەناردەکردنی دەرمان و یەکخستنی رێنماییەکانی چارەسەرکردنی شێرپەنجە پتەوتر دەکەن.