رووداو دیجیتاڵ
پشووی نەورۆز لە ئێران دەبێتە وەرزی گەشت و لەو ماوەیەدا ملیۆنان کەس لەو وڵاتەدا گەشت دەکەن؛ دوای هەڵگرتنی رێکارەکانی کۆرۆناش چوونی گەشتیاران بۆ پارێزگاکانی رۆژهەڵاتی کوردستان زیادیکردووە.
لە ماوەی 13 رۆژی پشووی نەورۆزدا نزیکەی پێنج ملیۆن کەس سەردانی ناوچە گەشتیارییەکانی پارێزگاکانی رۆژهەڵاتی کوردستانیان کردووە، کە پشکی شێر بەر پارێزگاکانی سنە و کرماشان کەوتووە.
بەپێی ئامارە فەرمییەکان، لەو 13 رۆژەدا یەک ملیۆن و 308 هەزار کەس سەردانی شوێنە گەشتیارییەکانی پارێزگای سنەیان کردووە، کە بەراورد بە ساڵی رابردوو 36٪ زیادیکردووە.
هەر بەپێی ئامارە فەرمییەکان، دوو ملیۆن و 176 هەزار کەس سەردانی شوێنە گەشتیارییەکانی پارێزگەی کرماشانیان کردووە.
لە پارێزگای ئیلامیش سەردانی گەشتیاران بەشێوەیەکی بەرچاو زیادیکردووە و بەراورد بە ساڵی رابردوو، چوونی گەشتیاران بۆ پارێزگاکە 40٪ زیادیکردووە و رۆژانە زیاتر لە 17 هەزار و 500 کەس چوونەتە ئەو پارێزگایە.
چوونی گەشتیارانیش بۆ پارێزگای لوڕستان نزیکەی 50٪ زیادیکردووە. بەڕێوەبەری رێگەوبانی پارێزگای لوڕستان دەڵێت، لە 13 رۆژی پشووەکانی نەورۆزدا 9 ملیۆن و 422 هەزار و 480 ئۆتۆمبێل لە رێگاوبانەکانی پارێزگای لوڕستان هاتووچۆیانکردووە کە بەراورد بە ساڵی رابردوو 44٪ زیادیکردووە.
سەردانی گەشتیاران بۆ شوێنە گەشتیاریی و مێژووییەکانی پارێزگای ورمێ 100٪ زیادیکردووە. بەڕێوەبەری گەشتیاریی و کولتووریی پارێزگای ورمێ دەڵێت، لە رۆژانی پشووی نەورۆزدا 420 هەزار کەس سەردانی شوێنە گەشتیاریی و مێژووییەکانی پارێزگاکەیان کردووە کە بەراورد بە ساڵی رابردوو 100٪ زیادیکردووە.
.png&w=3840&q=75)