لە پشووی نەورۆزدا 'پەپوولەکەی کۆیە' بە تەنیا بەدیار عەرەبانەکەیەوە لە بازاڕە

هاونیشتمانییەکی خەڵکی کۆیە بەناوی ئاکار پشتیوان، لە فەیسبووکی خۆی چەند وێنەیەکی بڵاوکردووەتەوە کە لە سۆشیاڵمیدیا دەنگدانەوەی هەبوو. لەبارەی چیرۆکی ئەو وێنانەوە پەیوەندیمان پێوەکرد و چیرۆکەکەی بەمشێوەیە باسکرد و گوتی: "رۆژی 21-3-2022 لە یەکەم رۆژی نەورۆز پیاسەیەکی ناو بازاڕی کۆیەم کرد، کاژێر 13:30 خولەک بوو، شار چۆڵ بوو، کەس لە دەرەوە نەبوو، دووکانەکان هەموو داخرابوون، لەدوورەوە کەسێکم بینی، کە لەسەر عەرەبانەکەی دانیشتبوو. سەرنجی راکێشام، چوومەلای و دانیشتم و مۆبایلەکەم دەرهێنا، لێم پرسی ئاساییە وێنەیەکت بگرم؟ لە وەڵامدا گوتی ئاساییە و یەکسەر دەستیکرد بە قسەکردن".

ئاکار لەو پیاوەی پرسیوە بەم نەورۆزە و پشووەدا چی دەکەی لە دەرەوە؟ وەڵامی داوەتەوە و گوتویەتی: "هەموو دێیەک رێگایەکی هەیە، چوومەوە ماڵەوە و نانم خوارد و یەکسەر هاتمەوە بازاڕ". لێی پرسی باشە خۆ کەس لەدەرەوە نییە ئیتر کەسابەتی چی؟ ئەویش لە وەڵامدا گوتی: "رزق بە دەست خوایە". 

ئەوەی زۆر سەرنجی ئاکاری راکێشاوە هۆگریی ئەو کەسە بوو بۆ عەرەبانەکەی، لە قسەکردنەکەی کەوتووەتە ستایشی عەرەبانەکەی و گوتی: "عەرەبانەکەمم نوێ کردووەتەوە و شیعرم لەسەری نووسیوە". بە گوتەی ئاکار شیعرەکانیشی لەبارەی هەژاری و دەستکورتییەوە بوون.

ئەو پیاوە بەتەمەنە ناوی ئاکۆ ئەحمەد حەمەدە و خەڵکی کۆیە پێیدەڵێن ئاکۆ پەپوولە.