رووداو دیجیتاڵ
لە پارێزگای ئەنبار بازگەیەک بۆردوومانکرا. بەرپرسێکی خۆجێیی پارێزگاکە دەڵێت، لە ئەنجامی هێرشەکەدا چوار چەکداری حەشد کوژراون و چواری دیکەش بریندارن، هەروەها پۆلیسێک و دوو هاووڵاتیش بریندار بوون.
بۆردوومانەکە کاژێر 15:30ـی دوای نیوەڕۆی ئەمڕۆ دووشەممە، 16-03-2026 بووە و ژووری ئەمنیی حەشدی شەعبی (سەر بە فەرماندەیی ئۆپەراسیۆنەکانی رۆژئاوای ئەنبار) لە بازگەی "شەهید حەیدەر" لە دەروازەی قەزای قائیم لە پارێزگای ئەنبار بۆردوومان کراوە.
عەبدوڵڵا جغێفی، راوێژکاری ئەمنیی لیژنەی ئاسایش و بەرگری لە ئەنجوومەنی پارێزگای ئەنبار بە تۆڕی میدیایی رووداوی راگەیاند: "بۆردوومانەکە لە رێگەی فڕۆکەی جەنگییەوە بووە و راستەوخۆ ژووری ئەمنیی حەشدی شەعبی لە بازگەکە کردووەتە ئامانج؛ لە ئەنجامدا 4 چەکداری حەشدی شەعبی کوژراون و 4 چەکداری دیکەش برینداربوون."
ڤیدیۆ گەیشت.. بۆردوومانی بازگەیەکی حەشدی شەعبییە لە دەروازەی قائیم لە پارێزگای ئەنبار pic.twitter.com/qn1xpUFjpc
— Rudaw (@Rudawkurdish) March 16, 2026
بەگوتەی عەبدوڵڵا جغێفی هەر لەو بۆردوومانەدا کارمەندێکی هێزی پۆلیسی فریاکەوتنی ئەنبار سەر بە وەزارەتی ناوخۆی عێراق کە لە بازگەکەدا بووە، لەگەڵ دوو هاووڵاتی سڤیل بریندار بوون.
