رووداو دیجیتاڵ
تۆم باراک، نێردەی ئەمریکا بۆ عێراق و سووریا لە لەندەن لەگەڵ شاندێکی باڵای عێراقی بە سەرۆکایەتیی د. فایەق زێدان، سەرۆکی ئەنجوومەنی باڵای دادوەری کۆبووەوە و ئاماژەی بە پەرەپێدانی پەیوەندییە ستراتیژییەکانی نێوان واشنتن و بەغدا کرد لە بوارە جیاوازەکاندا.
رۆژی سێشەممە، 10ی تشرینی دووەمی 2026، تۆم باراک لە راگەیێندراوێکدا لە ئێکس ئاماژەی بەوە کرد، "جێگەی شانازی بووە کە لە لەندەن لەگەڵ کۆمەڵێک لە بەرپرسانی باڵای عێراق بە سەرۆکایەتیی د. فایەق زێدان، سەرۆکی ئەنجوومەنی باڵای دادوەریی عێراق کۆبووەتەوە بۆ ئاڵوگۆڕکردنی بیروڕای گرنگ سەبارەت بە داهاتووی پەیوەندییەکانی نێوان ئەمریکا و عێراق".
نێردەی ئەمریکا بۆ عێراق و سووریا گوتی: "لە ساتەوەختێکی مێژووییدا بۆ هەردوو نەتەوەکەمان و ناوچەکە، دەرفەتێکمان لەبەردەستدایە بۆ ئەوەی لەسەر بنەماکانی هاوبەشییەکی لەمێژینە بنیاتی بنێین و رێگەیەکی پڕ لە هیوا بەرەو پێشەوە دیاری بکەین."
باراک تیشکی خستە سەر دەرفەتە فرەلایەنەکانی نێوان هەردوو وڵات و گوتی: "لە هاوکاریی دادوەری و بەهێزکردنی سەروەریی یاساوە تاوەکو وزە و وەبەرهێنان، گەشەپێدانی ئابووری، هاوبەشیی دامەزراوەیی، ئاسایش و سەقامگیریی هەرێمی، دەرفەتەکان بێشومارن"؛ ئاماژەی بەوەش کرد، "بوونی دامەزراوە دادوەرییە بەهێز و سەربەخۆکان لەگەڵ هاوکاریی قووڵتر لەنێوان سیستمە یاساییەکاندا، زۆر پێویستن بۆ دروستکردنی متمانە، پێشخستنی سەروەریی یاسا و دەستەبەرکردنی داهاتوویەکی گەشاوەتر".
لە کۆتایی پەیامەکەیدا، تۆم باراک دووپاتیکردەوە کە وڵاتەکەی بە پەرۆشەوە چاوەڕوانی بەردەوامیدانە بەم کارە هاوبەشە و رایگەیاند: "پێکەوە دەتوانین یارمەتیدەر بین لە خستنەگەڕی توانای ناوازەی عێراق، قووڵکردنەوەی پەیوەندییەکانی نێوان هەردوو گەلەکەمان و بنیاتنانی داهاتوویەک کە پێناسە کرابێت بە خۆشگوزەرانیی هاوبەش، دەرفەت و ئاشتییەکی بەردەوام بۆ نەوەکانی داهاتوو."
گوتەکانی باراک لە کاتێکدان ئەمریکا لە هەوڵێکی بێوچان دایە بۆ کەمکردنەوەی هەژموونی ئێران لەسەر عێراق، ئەمەش لە رێگەی نەهێشتن یان لاوازکردنی توانای گرووپە چەکدارەکانی نزیک لەو وڵاتە لە عێراقدا. واشنتن دەیەوێت بە رێکاری ئابووری و دادوەری ئامانجەکەی بەدیبهێنێت.
تۆم باراک، نێردەی ئەمریکا بۆ عێراق و سووریا:
جێگەی شانازی بوو کە ئەمڕۆ لە لەندەن لەگەڵ کۆمەڵێک لە بەرپرسانی باڵای عێراق بە سەرۆکایەتیی د. فایەق زێدان، سەرۆکی ئەنجوومەنی باڵای دادوەریی عێراق بۆ ئاڵوگۆڕکردنی بیروڕای گرنگ سەبارەت بە داهاتووی پەیوەندییەکانی ئەمریکا و عێراق کۆبوومەوە. لە ساتەوەختێکی مێژووییدا بۆ هەردوو نەتەوەکەمان و ناوچەکە، دەرفەتێکمان لەبەردەستدایە بۆ ئەوەی لەسەر بنەماکانی هاوبەشییەکی لەمێژینە بنیاتی بنێین و رێگەیەکی پڕ لە هیوا بەرەو پێشەوە دیاری بکەین. لە هاوکاریی دادوەری و بەهێزکردنی سەروەریی یاساوە تاوەکو وزە و وەبەرهێنان، گەشەپێدانی ئابووری، هاوبەشیی دامەزراوەیی، ئاسایش و سەقامگیریی هەرێمی، دەرفەتەکان بێشومارن. دامەزراوە دادوەرییە بەهێز و سەربەخۆکان و هاوکاریی قووڵتر لەنێوان سیستمە یاساییەکانماندا بۆ دروستکردنی متمانە، پێشخستنی سەروەریی یاسا و دەستەبەرکردنی داهاتوویەکی گەشاوەتر زۆر پێویستن. پێکەوە، دەتوانین یارمەتیدەر بین لە خستنەگەڕی توانای ناوازەی عێراق، قووڵکردنەوەی پەیوەندییەکانی نێوان هەردوو گەلەکەمان و بنیاتنانی داهاتوویەک کە پێناسە کرابێت بە خۆشگوزەرانیی هاوبەش، دەرفەت و ئاشتییەکی بەردەوام بۆ نەوەکانی داهاتوو. ویلایەتە یەکگرتووەکانی ئەمریکا بە پەرۆشەوە چاوەڕوانی بەردەوامیدانە بەم کارە گرنگە لە تەنیشت هاوبەشە عێراقییەکانمانەوە.
