رووداو دیجیتاڵ
ووەزارەتی نەوتی عێراق وردەکاری لەبارەی پڕۆژەی چالاککردنەوەی هێڵی بۆریی نەوتی کەرکووک - بانیاس لەگەڵ سووریا ئاشکرا دەکات و دەڵێ، توانای گواستنەوەی هێڵەکە دەگاتە یەک ملیۆن بەرمیل لە رۆژێکدا و نابێتە جێگرەوەی بۆریی کەرکووک - جەیهان؛ ئاماژە بەوەش دەکات، هاوتەریب لەگەڵ ئەوە، بۆرییەکی دیکە بەرەو پێشابوور و لەوێوە بۆ تورکیا رادەکێشرێ.
رۆژی یەکشەممە، 1ی تشرینی دووەمی 2026، سەلیم روکابی، گوتەبێژی وەزارەتی نەوتی عێراق بە تۆڕی میدیایی رووداوی راگەیاند: "بەرزترین ئاستی توانای بۆریی بانیاس یەک ملیۆن بەرمیل دەبێ لە رۆژێکدا. ئەم هێڵە نابێتە جێگرەوەی بۆریی کەرکووک - جەیهان. پڕۆژەکە دانانی هێڵێکی بۆری لەخۆدەگرێ بە ئاراستەی بەندەری بانیاس. هێڵێکی دیکەش بە ئاراستەی پێشابوور دەبێ."
سەبارەت بە لایەنی جێبەجێکار و گفتوگۆکان، گوتەبێژی وەزارەتی نەوتی عێراق گوتی: "پێشتر یاداشتێکی لێکتێگەیشتن لەگەڵ هاوپەیمانێتییەکی کۆمپانیا ئەمەریکی و قەتەرییەکان واژۆ کراوە و چەندین لیژنەی هاوبەش پێکهێنراون کە تاوەکو ئێستاش لە گفتوگۆدان."
سەلیم روکابی ئاماژەی بەوەشکرد: "لیژنەی هاوبەشی ئابووری، تەکنیکی و گرێبەستکاری پێکهێنراون و بەهیواین تاوەکو کۆتایی ئەم ساڵ گفتوگۆکان بگەنە ئەنجام و بگەینە رەشنووسێکی رێککەوتووی گرێبەستەکە."
پرسی بۆریی کەرکووک - بانیاس لە کاتێکدایە لە کۆتایی مانگی رابردوودا عەلی زەیدی، سەرۆکوەزیرانی عێراق چووە دیمەشق و لەگەڵ ئەحمەد شەرع، سەرۆکی سووریا، پرسی پەرەپێدانی پەیوەندییە سیاسی و ئابوورییەکانی تاوتوێ کرد.
لە سەردانەکەدا پرسی چالاککردنەوەی رێڕەوی هەناردەکردنی نەوتی عێراق لە رێگەی کەناراوەکانی سووریاوە لە دەریای نێوەڕاست تەوەرێکی سەرەکیی گفتوگۆکان بوو.
پێشتریش لە تەممووزی ئەم ساڵ، شاندێکی باڵای عێراق و سووریا لە واشنتن لەگەڵ هاوپەیمانێتییەکی نێودەوڵەتی کە پێکهاتووە لە کۆمپانیای شیڤرۆنی ئەمەریکی، کۆمپانیای (UCC)ـی قەتەری و (TI Capital)، یاداشتێکی لێکتێگەیشتنیان واژۆ کرد بۆ ئەنجامدانی توێژینەوەی تەکنیکی، ئابووری و دارایی بە مەبەستی نۆژەنکردنەوە و راکێشانی بۆرییەکی نوێی نەوت لە حەدیسەوە بۆ بانیاس.
هێڵی نەوتی کەرکووک - بانیاس کە لە ساڵی 1952 بە درێژایی نزیکەی 800 کیلۆمەتر دروستکرا، دوای جەنگی 2003ی سەر عێراق لە کار کەوت و لە شەڕی داعشیشدا ژێرخانەکەی تووشی وێرانکاری بوو.
