رووداو دیجیتاڵ
شانەی راگەیاندنی ئەمنیی عێراق دەڵێ، لە ماوەی تەنیا یەک هەفتەدا زیاتر لە 8 هەزار و 700 چەکی بێمۆڵەتی هاووڵاتییان بە شێوەیەکی یاسایی تۆمار کراون. ئاشکراشی کرد، تاوەکو ئێستا دەستیان بەسەر زیاتر لە ملیۆنێک چەکی جۆراوجۆردا گرتووە.
فەریق سەعد مەعن، سەرۆکی شانەی راگەیاندنی ئەمنیی عێراق، رۆژی شەممە (31ـی تشرینی یەکەمی2026) رایگەیاند: "لیژنەی نیشتمانی بۆ رێکخستنەوەی چەک لە وەزارەتی ناوخۆ، توانیویەتی لە ماوەی هەفتەی رابردوودا 8 هەزار و 731 پارچە چەکی بێمۆڵەت بەپێی چوارچێوە یاساییەکان تۆمار بکات."
بە گوتەی سەعد مەعن، ئەم هەڵمەتە بە سەرپەرشتیی یاسر مالیکی، وەزیری ناوخۆی عێراق و بەپێی رێنماییەکانی فەرماندەی گشتیی هێزە چەکدارەکان بەڕێوەدەچێت، بە ئامانجی کۆنترۆڵکردنی چەک لە دەستی دەوڵەت و سەپاندنی یاسا.
ئەو چەک و تەقەمەنییانەی لەرێگەی ئۆپەراسیۆنە ئەمنییەکانەوە دەستیان بەسەردا گیراوە:
- چەکی دەستبەسەرداگیراو: 1,191,441 پارچە.
- فیشەک و تەقەمەنیی جۆراوجۆر: 11,191,363 دانە.
- مووشەک و بۆمب: 201,809 دانە.
- مادەی تەقەمەنی: 18,180 دانە.
سەرۆکی شانەی راگەیاندنی ئەمنیی عێراق دەڵێت: "ئەم ئامارانە نیشانەی هەنگاوی جیدیی دەوڵەتن بۆ پاککردنەوەی شارەکان لە چەکی بێمۆڵەت و نەهێشتنی هەر دیاردەیەکی چەکداری لە دەرەوەی یاسا، تاوەکو ژینگەیەکی ئارام بۆ هاووڵاتییان دابین بکرێت". داواشی لە خەڵک کرد، بەردەوام بن لە هاوکاریی دەزگا ئەمنییەکان.
وەزارەتی ناوخۆی عێراق لەرێگەی کردنەوەی سەدان نووسینگەی تۆمارکردن و کاراکردنی پلاتفۆرمی ئەلیکترۆنیی (ئور)، دەیەوێت سەرجەم چەکە سووکەکان تۆمار بکات و چەکە قورس و مامناوەندەکانیش لە دەستی خەڵک دەربهێنێت.
دوا وادە بۆ تۆمارکردنی چەک، کۆتایی ساڵی 2026 دیاریکراوە و دوای ئەوە هەڵگرتنی هەر چەکێکی تۆمارنەکراو وەک "تاوان" مامەڵەی لەگەڵ دەکرێت.