رووداو دیجیتاڵ
بەپێی زانیارییەکانی تۆڕی میدیایی رووداو، بڕیارە ئەمڕۆ دووشەممە 2,000 ئەندامی یەکەکانی بەرخۆدانی شنگال (یەبەشە) لە چوارچێوەی رێککەوتنێکدا بە فەرمی تێکەڵ بە هێزە ئەمنییەکانی عێراق بکرێن.
سەرچاوەیەکی باڵا لە یەبەشە بە رووداوی راگەیاند: "ئەمڕۆ لە قۆناخی یەکەمدا دوو هەزار چەکدار لە هێزەکانمان بە فەرمی دەچنە نێو هێزە ئەمنییەکانی عێراق، هاوکات نزیکەی سێ بۆ چوار هەزار چەکداری دیکەشمان کە خەڵکی ناوچەکەن، لە قۆناخەکانی داهاتوودا بە فەرمی تێکەڵ دەکرێن."
بەپێی ئەو زانیارییانەی دەست رووداو کەوتوون، رێوڕەسمەکە ئەمڕۆ دووشەممە لەسەر چیای شنگال و بە ئامادەبوونی فەرماندە باڵاکانی هەردوولا بەڕێوەدەچێت، لەوانە: فەرماندەیی فیرقەی 20، فەرماندەیی ئۆپەراسیۆنە هاوبەشەکان، فەرماندەیی رۆژئاوای نەینەوا لەگەڵ فەرماندەکانی یەبەشە و یەژەشە.
لە پرۆسەی تێکەڵکردنەکەدا، ئەندامەکانی یەبەشە بەسەر سوپای عێراق، پۆلیسی نێوخۆیی و دەستەی حەشدی شەعبیدا دابەش دەکرێن.
چاوەڕوان دەکرێت دوای رێوڕەسمەکە، هێزە ئەمنییەکانی عێراق و فەرماندەکانی یەبەشە لە راگەیێندراوێکی هاوبەشدا تەواوی وردەکاریی رێککەوتنەکە بۆ رای گشتی بخەنەڕوو.
بەپێی زانیارییەکانی رووداو، رووماڵی میدیایی رێوڕەسمەکە تەنیا بۆ چوار دەزگای میدیایی عەرەبیی عێراق و سێ دەزگای نزیک لە یەبەشە سنووردار کراوە.
