رووداو دیجیتاڵ
وەزارەتی نەوتی عێراق رێککەوتنێکی لەگەڵ کۆمپانیای شیڤرۆنی ئەمریکی بۆ پێشکێشکردنی راوێژکاریی تەکنیکی بە کۆمپانیای نەوتی بەسرە واژۆکرد.
وەزارەتی نەوت ئەمڕۆ یەکشەممە، 13ی ئەیلوولی 2026، لە راگەیێندراوێکدا بڵاویکردەوە، رێککەوتنەکە بە چاودێریی باسیم محەممەد خوزەیر عەبادی، وەزیری نەوت واژۆ کراوە.
وەزیری نەوتی عێراق رایگەیاند: "رێککەوتنەکە پێشکێشکردنی راوێژکاری لە ماوەی گفتوگۆکردن لەگەڵ کۆمپانیای نەوتی بەسرە لەخۆدەگرێت، کە تایبەتە بە پەرەپێدانی کێڵگەی رۆژئاوای قوڕنە/2."
کێڵگەی رۆژئاوای قوڕنە/2، یەکێکە لە گەورەترین کێڵگە نەوتییەکانی جیهان و دەکەوێتە باشووری عێراق، نزیکەی 65 کیلۆمەتر لە باکووری رۆژئاوای شاری بەسرە.
یەدەگی نەوتی کێڵگەکە بە نزیکەی 14 ملیار بەرمیل دەخەمڵێندرێت، کە وایکردووە ببێتە یەکێک لە گرنگترین کێڵگە نەوتییەکان لەسەر ئاستی جیهاندا.
ئاستی بەرهەمهێنانی رۆژانە لە مانگی کانوونی دووەمی ئەم ساڵ گەیشتە نزیکەی 480,000 بەرمیل، پلانیش هەیە بۆ داهاتوو بۆ نزیکەی 800,000 بەرمیل لە رۆژێکدا بەرزبکرێتەوە.
حکومەتی عێراق بەردەوامە لە هەوڵەکانی بۆ پەرەپێدانی زیاتری کێڵگەکە، دوایین هەوڵیش بریتی بوو لە واژۆکردنی رێککەوتنێک لەگەڵ کۆمپانیای شیڤرۆنی ئەمریکی بۆ پێشکێشکردنی راوێژکاریی تەکنیکی.
.webp&w=3840&q=75)
