رووداو دیجیتاڵ
شانەی راگەیاندنی ئەمنیی عێراق دەڵێت، لە کەنارەکانی رووباری زێی بچووک تەقە لە کامێرایەکی گەرمبینی سەر بە فەرماندەیی ئۆپەراسیۆنەکانی کەرکووک کراوە، بەهۆیەوە کامێراکە زیانی بەرکەوتووە، بەڵام هیچ زیانێکی گیانی نەبووە.
رۆژی شەممە، 12ی ئەیلوولی 2026، شانەی راگەیاندنی ئەمنی لە راگەیێندراوێکدا بڵاویکردەوە، "ئێوارەی ئەمڕۆ لە ناوچەیەکی سەخت کە دەڕوانێتە سەر کەنارەکانی رووباری زێی بچووک لە سنووری فەرماندەیی ئۆپەراسیۆنەکانی نەینەوا، کامێرایەکی گەرمبین سەر بە لیوای مەغاویری سەر بە فەرماندەیی ئۆپەراسیۆنەکانی کەرکووک رووبەڕووی تەقەی چەکدارانی نەناسراو بووەوە."
بەگوێرەی راگەیێندراوەکە، دەستڕێژی گوللـەکە زیانی بە کامێرایە گەرمبینەکە گەیاندووە، بێ ئەوەی هیچ زیانێکی گیانی لەنێو ریزەکانی هێزە ئەمنییەکاندا تۆمار بکرێت.
شانەی راگەیاندنی ئەمنی ئاماژەی بەوەش کردووە، دەستبەجێ دوای رووداوەکە، ئەو هێزە ئەمنییانەی کۆنتڕۆڵی ناوچەکەیان لە دەستدایە دەستیان بە ئۆپەراسیۆنێکی فراوانی کێوماڵکردن کردووە بە مەبەستی دۆزینەوە و راوەدوونانی سەرچاوەی تەقەکان و دەستگیرکردنی ئەنجامدەرانی.
