رووداو دیجیتاڵ
سەرۆکی ئەنجوومەنی باڵای دادوەری و هەڵسوڕێنەری کاروباری باڵیۆزخانەی ئەمریکا، سنووردارکردنی چەک لەدەستی دەوڵەت تاوتوێ دەکەن و بەگوێرەی ئەو ئەنجوومەنە، لیژنەیەکى هاوپەیمانى چوارچێوەی هاوئاهەنگی، پلانى سنووردارکردنی چەک ئامادە دەکات.
ئەو کۆبوونەوەیەی فایەق زێدان، سەرۆکی ئەنجوومەنی باڵای دادوەری و ستیڤن فەیگن، هەڵسوڕێنەری کاروباری باڵیۆزخانەی ئەمریکا لە عێراق، ئەمڕۆ دووشەممە 7ی ئەیلوولی 2026 ئەنجامدراوە.
بەگوێرەی راگەیێنراوێکی ئەنجوومەنی باڵای دادوەری، لەو کۆبوونەوەیەدا باس لە رێکارەکانی دادگە کراوە بۆ پاڵپشتیی رێوشوێنەکانى حکومەت بۆ جێبەجێکردنی پلانى سنووردارکردنی چەک لەدەستی دەوڵەت، لەسەر بنەمای پلانێک کە لیژنەیەکی سەر بە هاوپەیمانى چوارچێوەی هاوئاهەنگی ئامادەی دەکات و لە دوای ئامادەکردنی، لە کاتێکی گونجاودا رادەگەیێنرێت.
30ی ئەیلوول وادەی کشانەوەی هێزەکانی هاوپەیمانیی دژی داعشە لە عێراق، کە مەرجی بەشێک لە گرووپە چەکدارەکانە بۆ بەشداریکردن لە سنووردارکردنی چەک لەدەستی دەوڵەت.
عەقیل ردێنی، گوتەبێژی هاوپەیمانیی نەسر بە تۆڕی میدیایی رووداوی راگەیاند: ئەو لیژنەیەی چوارچێوەی هاوئاهەنگی کە پلانى سنووردارکردنی چەک لەدەستی دەوڵەت دادەڕێژێت، هەمان ئەو لیژنەیەیە کە گفتوگۆ لەگەڵ گرووپە چەکدارەکان دەکات.
لیژنەکە پێکهاتووە لە: نووری مالیکی، سەرۆکی هاوپەیمانیی دەوڵەتی یاسا؛ هادی عامری، ئەمینداری گشتیی رێکخراوی بەدر؛ محەممەد شیاع سوودانی، سەرۆکی هاوپەیمانیی ئاوەدانکردنەوە و گەشەپێدان.
عەقیل ردێنی رایگەیاند، کە ئەوەی ئێستا گفتوگۆی لەسەر دەکرێت ئەوەیە، کە چەکی گرووپەکان رادەستی دەستەی حەشدی شەعبی بکرێت، بۆ ئەوەی بڕیاری جەنگ بەدەستی پەرلەمان و فەرماندەی گشتیی هێزە چەکدارەکان بێت و ئەو لیژنەیەی چوارچێوەی هاوئاهەنگی، لە پلانەکەیدا تێڕوانینەکان بۆ جێبەجێکردنی سنووردارکردنی چەک لەدەستی دەوڵەت کۆدەکاتەوە.
تاوەکو ئێستا سێ گرووپی چەکدار ئامادە نەبوون بە تەواوی چەک دابنێن و لیژنەکەی چوارچێوەی هاوئاهەنگیش لە گفتوگۆدایە لەگەڵیان، کە بریتین لە: بزووتنەوەی نوجەبا، هەردوو کەتیبەکانی حیزبوڵڵا و سەیدولشوهەدا.
.jpeg&w=3840&q=75)
