وەزیری نەوت و کۆمپانیاکان کۆبوونەوە؛ "گرنگە بەربەستەکانی بەردەم زیادکردنی بەرهەمهێنان لاببرێن"

رووداو دیجیتاڵ

وەزیری نەوتی عێراق لەگەڵ نوێنەری کۆمپانیاکانی نەوت کۆبووەوە و بە گرنگی زانی بەربەستەکانی بەردەم زیادکردنی بەرهەمهێنان لاببرێن و گوتی: "کۆمپانیاکان بەڵێندەر نین، بەڵکو هاوبەشن".

ئەو کۆبوونەوەیە رۆژی چوارشەممە، 24ی حوزەیرانی 2026، لەنێوان باسم عەبادی، وەزیری نەوت و نوێنەری ژمارەیەک کۆمپانیا کرا، لەوانە کۆمپانیاکانی تۆتاڵ، شێڵ، پترۆچاینا و پترۆلیۆم.

بەگوێرەی راگەیێنراوێکی وەزارەتی نەوتی عێراق، لەو کۆبوونەوەیەدا باسم عەبادی بە گرنگی زانیوە کە دیدار لەگەڵ کۆمپانیا جیهانییەکان بکرێت کە لە کەرتی پەرەپێدانی کێڵگەکانی نەوت و گازی عێراق کار دەکەن، تاوەکو ئەو بەربەستانە لاببرێن کە رووبەڕووی کارەکانیان و خێراکردنی هەنگاوەکانیان دەبنەوە بۆ زیادکردنی بەرهەمهێنان و باشترکردنی.

بەشێک لە کۆمپانیا بەرهەمهێنەرەکانی نەوتی عێراق بەهۆی جەنگی ئێران لەگەڵ ئەمریکا و ئیسرائیل، کارەکانیان لە کێڵگەکانی نەوتی عێراق راگرتووە.

وەزیری نەوتی عێراق رایگەیاند، ئەو کۆمپانیایانەی لە عێراق کار دەکەن وەک کۆمپانیای بەڵێندەر لێیان ناڕوانن، بەڵکو ئەوان هاوبەشن و بە هاوکاری هەردوولا کار لەسەر جێبەجێکردنی گرێبەستەکانیان دەکەن و کێشەکانیان لە رێگەی گفتوگۆ و تاوتوێکردنەوە چارەسەر دەکەن.

ئێستا ئاستی بەرهەمهێنانی رۆژانەی نەوتی عێراق نزیکەی 1.5 ملیۆن بەرمیل نەوتە، لەکاتێکدا بۆ دۆخێکی ئاسایی پێویستی بە بەرهەمهێنانی 4.5 ملیۆن بەرمیلە.

باسم عەبادی داوای لە کۆمپانیاکان کرد کە مامەڵەی وەرگرتنی شایستە داراییەکانیان لە رێگەی کۆمپانیای بەبازاڕکردنی نەوتی عێراق (سۆمۆ) پێشکێش بکەن، لە سایەی ئەو پێشهاتە نوێیەی لەبارەی تەنگەی هورمز هاتووەتە ئاراوە.

لە دوای لێکتێگەیشتنی نێوان ئەمریکا و ئێران، هاتووچۆی کەشتییەکانی نەوت لە تەنگەی هورمز بەرەو ئاساییبوونەوە دەچێت کە رێگەی هەناردەی نزیکەی 90%ی نەوتی عێراقە.