رووداو - تەندروستی
سەرۆکوەزیرانی پێشووتری ئیتاڵیا پێویستیی گرنگی گۆڕینی بیرکردنەوەی بڕیاربەدەستانی سیاسیی لە پلانی کورتخایەن و لۆکاڵییەوە بۆ چوارچێوەیەکی فراوانتر، جیهانی و درێژمەودا خستەڕوو، بۆ ئەوەی بە سەرکەوتوویی رووبەڕووی هەڕەشە تەندروستی و ژینگەییە پێکەوەبەستراوەکان ببنەوە.
ماریۆ مۆنتی، سەرۆکوەزیرانی پێشووتری ئیتاڵیا و سیناتۆری حکومەتی ئیتاڵیا لەنێو لووتکەی تەندروستیی جیهانیی ئەم ساڵدا رایگەیاند، "هەموو ئەو کێشانەی کە لە سیاسەتدا رووبەڕوویان دەبینەوە، لەگەڵ تێپەڕبوونی کاتدا، زیاتر پێویستیان بە فراوانکردنی ئاسۆی بیرکردنەوە دەبێت، ئەمەش لەڕووی کات و جوگرافیاوە دەبێت''.
مەبەستی ئەو لە کات ئەوە بوو کە پێویستە سەرکردە سیاسییەکان کردە کورتخایەنەکان تێپەڕێنن لەکاتی مامەڵەکردن لەگەڵ قەیرانە جیهانییە ئاڵۆزەکاندا بەتایبەت قەیرانی بڵاوبوونەوەی پەتاکان.
ئەوەشی باس کرد، ئەگەر سیاسییەکان لەوە تێبگەن کە تەندروستی واتە داهاتوو، دەیکەنە پێشینەی کارەکانیان.
لووتکەی تەندروستیی جیهانیی 2026 لە رۆژانی 11 تاوەکو 13ـی تشرینی یەکەم لە بەرلینی پایتەختی ئەڵمانیا بەردەوام دەبێت و درووشمی ئەم ساڵیش ''لە قەیرانەوە بۆ خۆڕاگری، داهێنان لەپێناو تەندروستی''ـیە.
لووتکەکە سەرکردە سیاسی و زانستییەکان لەگەڵ کۆمەڵگەی مەدەنی و کەرتە تایبەتییەکان کۆ دەکاتەوە. گفتوگۆکان باس لە ئیبۆلا و نەخۆشییە گوازراوەکانی دیکە، دژەبەکتریاکان، ئامادەکاری بۆ پەتای داهاتوو، سیستمی تەندروستیی خۆڕاگر، چاودێریی تەندروستی لە ناوچە کێشە لەسەرەکان وەک ئۆکراینا و هەڕەشە تەندروستییەکانی پەیوەست بە کەشوهەوا دەکەن.
دکتۆر ئەکسل پریس، سەرۆکی لووتکەی تەندروستیی جیهان دەڵێت "دەستکەوتەکانی رابردوو و پێشکەوتنی بەردەوام لە بواری تەندروستیی جیهانیدا، رووبەڕووی ئاڵنگاریی زیاتر دەبنەوە بەهۆی قەیرانە فرەلایەن و یەک لەدوای یەکەکانەوە. بۆ بنیادنانی سیستمێکی تەندروستیی خۆڕاگر، کاریگەر و دادپەروەرانە، پێویستیمان بە داهێنانە لە سەرانسەری بواری پزیشکیی زیندەیی و تەکنەلۆژیا، دارایی، گەیاندنی خزمەتگوزاری و هاوئاهەنگیی سیاسی. ئەمەش پێویستی بە هاوبەشی و متمانە هەیە لەنێو کەرتی تەندروستی و دەرەوەیدا و ناوەکی دروشمی سەرەکیی لووتکەی جیهانیی تەندروستی 2026 پێکدەهێنێت''.
