رووداو دیجیتاڵ
ئەمڕۆ چوارشەممە نرخی نەوت رووی لە بەرزبوونەوە کرد، هۆکاری بەرزبوونەوەی نرخی نەوت بۆ پەرەسەندنی نیگەرانییەکان لەبارەی پەککەوتنی خستنەڕووی وزە و زیاتربوونی گرژییەکان لە رۆژهەڵاتی نێوەڕاست و پێکدادانی سەربازیی نێوان سعودیە و حووسییەکان دەگەڕێتەوە.
نرخی نەوتی خاوی برێنت بە رێژەی 1.24% بەرزبوونەوە و هەر بەرمیلێکی بە 107.02 دۆلار مامەڵەی پێوەکرا. نرخی نەوتی خاوی تەکساسی ئەمریکا بە رێژەی 1.18% بەرزبووەوە و گەیشتە 95.25 دۆلار بۆ هەر بەرمیلێک.
پێکدادانەکانی نێوان سعودیە و حوسییەکان زیادبووە، ئەمەش دوای ئەوە هات کە لە چەند رۆژی رابردوودا فڕۆکەخانەی سەرەکی ریاز لەلایەن حووسییەکانەوە کرایە ئامانج.
فڕۆکە جەنگییەکانی هاوپەیمانی بەڕێبەرایەتیی سعودیە، بەندەرەکانی وزە و کۆگاکانی سووتەمەنیی حوسییەکانیان لە یەمەن بۆردومان کردووە. هەرچەندە گوتەبێژی هاوپەیمانییەکە رایگەیاندووە کە رێکاری پێویست گیراوەتەبەر بۆ ئەوەی زیان بەر هاووڵاتییانی سڤیل نەکەوێت.
لە هەمان کاتدا، گرژی و ئاڵۆزییەکانی نێوان ویلایەتە یەکگرتووەکانی ئەمریکا و ئێرانیش بەردەوامن.
فەرماندەیی ناوەندیی هێزەکانی ئەمریکا (سێنتکۆم) لێدوانانەکانی فەرماندەی هێزی دەریایی سوپای پاسدارانی ئێرانی رەتکردەوە کە گوتبووی تەنگەی هورمز لەژێر کۆنترۆڵی ئێراندایە و هەر کەشتییەکی جەنگیی ئەمریکا لێی نزیک ببێتەوە نوقم دەکرێت.
سێنتکۆم لە پۆستێکدا لە تۆڕی کۆمەڵایەتیی ئێکس رایگەیاند، "فەرماندەی هێزی دەریایی سوپای پاسداران هیچ هێزێکی دەریایی نەماوە، هێزەکانی ئەمریکا و هاوبەشە هەرێمییەکانی بە روونی کۆنترۆڵی تەنگەی هورمزیان لەدەستدایە."
پۆڵ تیۆدۆر جۆنز، وەبەرهێنەر و مامەڵەکاری ناسراوی بازاڕی کاڵاکان، رایگەیاند بەهۆی جەنگی ئێرانەوە پێدەچێت نرخی نەوت 20 بۆ 25 دۆلاری دیکە بۆ هەر بەرمیلێک بەرزببێتەوە.
دامەزرێنەر و بەڕێوەبەری وەبەرهێنان لە کۆمپانیای (تیۆدۆر ئینڤێستمێنت) هەروەها دەڵێت، "پێشبینیی بەرزبوونەوەی زیاتری نرخی نەوت دەکەم، و پێموایە دەتوانێت 20 تاوەکو 25 دۆلاری دیکە هەڵبکشێت."
ئینڤێستمێنت ئاماژەی بەوەش دا، "ئەگەر بڕیار بووایە هەنگاوێک بۆ هێورکردنەوەی دۆخەکە بنرێت، دەبوو پێش هەڵبژاردنی نیوەخولی ئەمریکا روویبدایە."
