رووداو دیجیتاڵ
بڕیارە لەم هەفتەیەدا پرسی کاراکردنی فرۆشتنی دۆلاری بانکی ناوەندی بە گەشتیاران لە رێگەی هەردوو فڕۆکەخانەی نێودەوڵەتیی هەولێر و جەلال تاڵەبانی لە سلێمانی، لەلایەن بانکی ناوەندییەوە یەکلا بکرێتەوە، کە دراوەتە دوو کۆمپانیا.
ناوى ئەو دوو کۆمپانیایە لەلاى رووداو پارێزراوە کە کارى فرۆشتنى دۆلار بە گەشتیاران لە هەردوو فڕۆکەخانەکە دەکەن.
بەرپرسى لە یەکێک لەو دوو کۆمپانیایە بە تۆڕی میدیایی رووداوی راگەیاند، پێیان راگەیاندووین، ئەگەری زۆرە رۆژی چوارشەممە (4ی تشرینی دووەم) لەگەڵ تیروپشک بۆ کۆمپانیاکانی مامەڵەی دۆلار لە فڕۆکەخانەکان لەلایەن بانکى ناوەندى عێراقەوە، هەنگاوی کاراکردنی فرۆشتنی دۆلاریش لە هەردوو فڕۆکەخانەکەی هەرێمی کوردستان دەستپێبکات.
لە فڕۆکەخانەکانی عێراق فرۆشتنی دۆلار بە گەشتیاران بە نرخی فەرمی بەردەوامە، کە 100 دۆلاریان بە 152 هەزار دینار پێ دەفرۆشرێت.
سروە محەممەد، ئەندامی پەرلەمانی عێراق کە بەدواداچوونی بۆ ئەو پرسە کردووە بە رووداوی راگەیاند: لە رێگەی بانکی ناوەندییەوە پێم راگەیێنراوە لەم هەفتەیەدا بڕیاری کۆتایی لەسەر ئەو کۆمپانیایانە دەدرێت، کە لە فڕۆکەخانەکانی هەرێمی کوردستان کاری فرۆشتنی دۆلار بە گەشتیاران دەکەن و دوو کۆمپانیا رێگەپێدانیان بۆ کراوە کە ئەو کارە بکەن.
لە 18ی تشرینی یەکەم، نوێنەرایەتیی حکومەتی هەرێمی کوردستان لە بەغدا، بە نووسراوی فەرمی نووسراوی هەردوو فڕۆکەخانەکەی هەرێمی کوردستانی ناردووە بۆ بانکی ناوەندی عێراق لە بارەی ئەو رێکارانەی گرتوویانەتەبەر بۆ کاراکردنی فرۆشتنی دۆلار بە گەشتیاران لەو دوو فڕۆکەخانەیە لەگەڵ گرێبەستی دانانی ئۆفیسی کۆمپانیاکان لە هەردوو فڕۆکەخانەکەدا.
بەرپرسی کۆمپانیاکەی کە رووداو قسەی لەگەڵ کردووە رایگەیاند: لەدوای راگەیاندنی ناوی کۆمپانیاکان، بانکی ناوەندی لیژنەیەک رەوانەی فڕۆکەخانەکانی هەرێمی کوردستان دەکات بۆ دڵنیابوونەوە لە ئامادەکارییەکان و ئامێرەکانی پێدانی دۆلار بەر لەوەى بە فەرمى بکەوێتەکار.
بەگوێرەی رێکارەکانی بانکی ناوەندیی عێراق هەر گەشتیارێک لە ساڵێکدا دەتوانێت شەش جار لە دۆلاری بانکی ناوەندی سوودمەند بێت، لە 2ی تشرینی یەکەم بڕیاردرا کە بڕەکەی لە دوو هەزار دۆلارەوە بکرێتە سێ هەزار دۆلار.
.jpg&w=3840&q=75)