رووداو دیجیتاڵ
یەدەگی بانکی ناوەندی بەبەهاى نوێى دینار بەرامبەر بە دۆلار، بۆ 66.7 ملیار دۆلار کەمی کردووە، کە بەراورد بە سەرەتای ئەم ساڵ کەمبوونەوەکە گەیشتووەتە زیاتر لە 20 ملیار دۆلار.
بەگوێرەی نوێترین ئاماری بانکی ناوەندیی عێراق بۆ دۆخی دارایی کە تاوەکو 24ی ئەیلوولی ئەم ساڵە، یەدەگی بانکەکە بۆ 100 تریلیۆن و 67 ملیار دینار کەمبووەتەوە، کە بە ئەژمارکردنەوەی بە بەهای نوێی دینار بەرامبەر بە دۆلار کە 150 هەزار دینارە، دەکاتە 66.7 ملیار دۆلار.
ئەو کەمبوونەوەیە پەیوەندیدارە بە کەمبوونی داهات و هەناردەی نەوت، کە بە قەرز دراوە بە وەزارەتی دارایی فیدراڵ بۆ پڕکردنەوەی کورتهێنانی مانگانەی خەرجییەکان.
بەراورد بە سەرەتای ئەم ساڵ، یەدەگی بانکی ناوەندی 30 تریلیۆن و 217 ملیار دینار کەمیکردووە، کە بە بەهای نوێی دینار بەرامبەر بە دۆلار دەکاتە 20.1 ملیار دۆلار.
زۆربەی یەدەگی بانکی ناوەندیی عێراق پێکهاتووە لە قەواڵەی دارایی، پارەی کاش و زێڕ.
بەهای قەواڵە داراییەکانی عێراق بەراورد بە سەرەتای ئەم ساڵ، 26.9 تریلیۆن دینار کەمیکردووە، کە زۆربەی بۆ پڕکردنەوەی کورتهێنانی خەرجی فرۆشراون.
هەرچی بەهای زێڕە، بەراورد بە سەرەتای مانگی ئەیلوول نزیکەی 1.4 تریلیۆن دینار کەمیکردووە، بەڵام زۆربەی ئەم کەمکردنەوەیە پەیوەستە بە دابەزینی نرخی زێڕ لە جیهاندا.
حکومەتی عێراق مانگانە پێویستی بە زیاتر لە 10 تریلیۆن دینارە بۆ خەرجییەکانی، کە 7.7 تریلیۆن دیناری بۆ مووچەیە.
لە 6ی تشرینی یەکەمەوە ئەنجوومەنی وەزیرانی عێراق بڕیاریدا بەهای فەرمیی دینار بەرامبەر بە دۆلار بگۆڕێت، لە 130 هەزار دینارەوە بۆ 150 هەزار دینار ، پاساوی سەرەکیی ئەو گۆڕانکارییەش پڕکردنەوەی کورتهێنانی خەرجییەکانێتی.
بەهۆی بڕیاری گۆڕینی بەهای دینار بەرامبەر بە دۆلار، مانگانە وەزارەتی دارایی عێراق نزیکەی یەک تریلیۆن دیناری بۆ دەگەڕێتەوە، کە دەتوانێت چواریەکی کورتهێنانەکەی پێ پڕبکاتەوە، کە مانگانە نزیکەی چوار تریلیۆن دینارە.
.jpg&w=3840&q=75)