رووداو دیجیتاڵ بانکی بازرگانیی هەرێم (RTB) ئەمڕۆ، سێشەممە یەکەمین کۆبوونەوەی ئەنجوومەنی بەڕێوەبەرانی نوێی خۆی دەبەستێت؛ کە ژمارەیەک لە ناسراوترین کەسایەتییەکانی جیهانی چاودێریی دارایی تێیدا کۆبوونەتەوە، لەوانە کاربەدەستانی پێشووی گەنجینەی ئەمریکا، رێکخراوی FATF و ئاژانسی .OFAC بەم هەنگاوە، RTB دەبێتە یەکەم بانکی ناوخۆیی عێراق و هەرێمی کوردستان کە سیستمی بەڕێوەبردنی خۆی دەگەیەنێتە ئاستە نێودەوڵەتییەکان، هەنگاوێک متمانەی بانکیی لە ناوچەکەدا دەگۆڕێت. ئەنجوومەنەکە لە لایەن بەڕێز مارشاڵ بیلینگزلیا، یاریدەدەری پێشووی وەزیری گەنجینەی ئەمریکا و سەرۆکی پێشووی FATF، سەرۆکایەتی دەکرێت. FATF دامەزراوەیەکی جیهانییە کە ستانداردەکانی بەرەنگاربوونەوەی سپیکردنەوەی پارە و پاڵپشتی تیرۆر دادەنێت. هەروەها چەندین ناوی دیاری دیکە بەشێکن لە تیمەکە، وەک گریگۆری گاتجانیس، جێگری پێشووی بەڕێوەبەری ئاژانسی OFAC؛ ئیلزی زنۆتینا، سەرۆکی پێشووی یەکەی هەواڵگری داراییی لاتیڤیا و راوێژکاری IMF و کۆمیسیۆنی ئەورووپا؛ هەروەها دکتۆر خۆرخی جێمینێز، پسپۆڕی سیستەمی پارەدانی فیدراڵی ئەمریکا. لە ئەنجوومەنەکەدا، هاشم هەمەوەندی، باسل کیوان، عەدنان کیفایەت و رائید حجازی، ئەندامن تێیدا. لەهەمانکاتدا، لە ڕووی کارگێڕییەوە، یڵماز ئۆگور ئای وەک بەڕێوەبەری جێبەجێکار ئەرکی بەڕێوەبردنی رۆژانە دەگرێتە ئەستۆ، کە زیاتر لە بیست ساڵ ئەزموونی لە بازاڕە داراییەکانی عێراق و تورکیادا هەیە. ئەم تیمە بەهێزە لە پسپۆڕانی گەنجینەی ئەمریکا و دامەزراوە نێودەوڵەتییەکان، دەبنە هۆکارێک بۆ کردنەوەی دەرگایەکی نوێ بە ڕووی کەرتی بانکیی عێراق و رزگارکردنی لەو گۆشەگیرییە داراییەی کە ساڵانێکە بەرۆکی گرتووە. ئەم گۆڕانکارییە گەورەیە لە سێ رەهەندی سەرەکییەوە دەتوانێت تەواوی هاوکێشە ئابوورییەکانی عێراق بگۆڕێت. یەکەم: بەهێزکردنی خودی بانکەکە . RTB سیستەمی چاودێری ناوخۆیی، بەڕێوەبردنی مەترسی و ژێرخانی دارایی خۆی دەگەیەنێتە ئاستی بانکە نێودەوڵەتییەکان، بە جۆرێک کە پارێزراوبێت لە مەترسییەکانی سپیکردنەوەی پارە و پابەند بێت بە ستانداردە جیهانییەکان. دووەم: واڵاکردنی دەرگایەک بۆ سیستەمی داراییی جیهانی. گەیشتن بەم ئاستە لە متمانە رێگە بۆ پەیوەندیی بانکیی هاوتا (Correspondent Banking) لەگەڵ بانکە گەورەکانی ئەمریکا و ئەورووپا خۆشدەکات، هەنگاوێک کە تێچووی هاوردە و هەناردە بۆ بازرگانانی ناوخۆ کەمدەکاتەوە و جوڵەی دارایی ئاسانتر دەکات. سێیەم: راکێشانی وەبەرهێنانی بیانی. کاتێک کۆمپانیا نێودەوڵەتییەکان دەبینن بانکێکی ناوخۆیی بەپێی بەرزترین ستانداردەکانی جیهانی بەڕێوەدەبردرێت، متمانەیان بۆ وەبەرهێنان لە عێراق و هەرێمی کوردستان زیاد دەکات. بانکی بازرگانیی هەرێم (RTB) لە مانگی تەمموزی 2001ەوە خزمەتگوزاری بانکی پێشکەش دەکات، لە ئەیلولی 2003 ئۆفیسی سەرەکی لە هەولێر دامەزراندووە، مۆڵەتی لە بانکی ناوەندی عێراق وەرگرتووە و تۆمارکراوە و لە 2001ەوە تائێستا هیچ سزایەکی بانکی لەسەر نەبووە.
